रुपेश देशमुख ( ब्रम्हपुरी प्रतिनिधी ) : सध्याच्या जागतिक तणावपूर्ण परिस्थितीमुळे भविष्यात इंधनाच्या तुटवड्याची शक्यता लक्षात घेता ब्रम्हपुरी तालुका प्रशासन सतर्क झाले असून घरगुती गॅस सिलेंडरच्या अवैध वापराविरुद्ध धडक कारवाई सुरू करण्यात आली आहे. जिल्हाधिकारी चंद्रपूर व जिल्हा पुरवठा अधिकारी यांच्या निर्देशानुसार तहसीलदार सतीश मासाळ यांच्या मार्गदर्शनाखाली तालुक्यात विशेष तपासणी मोहीम राबविण्यात येत आहे.
या मोहिमेदरम्यान ब्रम्हपुरी शहरातील गुलमोहर बिर्याणी सेंटर व हिंदुस्थान हॉटेल येथे घरगुती गॅस सिलेंडरचा अवैध व्यावसायिक वापर केल्याचे आढळून आले. या प्रकरणी जीवनावश्यक वस्तू अधिनियम 1955 च्या कलम 3 व 7 अंतर्गत पुरवठा निरीक्षक महेंद्र रामटेके यांनी संबंधितांवर गुन्हा नोंदविला आहे. प्रशासनाने स्पष्ट केले की, घरगुती गॅस सिलेंडरचा व्यावसायिक वापर करणे तसेच अवैध साठवणूक करणे हा गंभीर गुन्हा असून अशा प्रकारांवर कडक कारवाई करण्यात येणार आहे.
तालुक्यातील हॉटेल, रेस्टॉरंट, व्यावसायिक प्रतिष्ठाने, गॅस एजन्सी तसेच अवैध साठवणूक असलेल्या ठिकाणांची तपासणी करण्यासाठी विशेष भरारी पथके तयार करण्यात आली आहेत. पुरवठा निरीक्षण अधिकारी अमित कांबळे यांच्या नेतृत्वाखाली महेंद्र रामटेके, दिलीप मेश्राम, राजेश आंबाघरे यांच्यासह तालुकास्तरीय पथक कार्यरत आहे. याशिवाय मंडळ अधिकारी व तलाठी यांच्या माध्यमातून मंडळनिहाय सहा पथके तयार करण्यात आली असून या कारवाईत पोलीस विभागाचेही सहकार्य राहणार आहे.
दरम्यान तालुक्यातील चारही गॅस एजन्सीकडे घरगुती गॅसचा पुरेसा साठा उपलब्ध असल्याचे प्रशासनाने स्पष्ट केले आहे. नोंदणीकृत ग्राहकांना ओटीपी प्रणालीद्वारेच गॅस सिलेंडर उपलब्ध करून दिला जाणार आहे. त्यामुळे नागरिकांनी अफवांवर विश्वास ठेवू नये तसेच गॅस एजन्सीमध्ये अनावश्यक गर्दी टाळावी, असे आवाहन तहसीलदार सतीश मासाळ यांनी केले आहे.
घरगुती गॅसबाबत कोणतीही अडचण आल्यास संबंधित गॅस कंपनीच्या टोल-फ्री क्रमांकावर तक्रार नोंदवावी किंवा तहसील कार्यालय, ब्रम्हपुरी येथील पुरवठा शाखेशी संपर्क साधावा, असेही प्रशासनाने नागरिकांना आवाहन केले आहे.
