विष्णु गायकवाड ( गेवराई प्रतिनिधी ) : आंतरराष्ट्रीय महिला दिनानिमित्त गेवराई तालुक्यातील गढी येथे रागिनी प्रतिष्ठानच्या वतीने महिलांसाठी विशेष आरोग्य तपासणी शिबिर व जनजागृतीपर व्याख्यानाचे आयोजन करण्यात आले होते. हा कार्यक्रम डॉ. शशिकांत मुळे हॉस्पिटल येथे पार पडला. महिलांमध्ये आरोग्याबाबत जागरूकता निर्माण करणे आणि नियमित तपासणीचे महत्त्व पटवून देणे हा या उपक्रमाचा मुख्य उद्देश होता.
कार्यक्रमाच्या सुरुवातीला उपस्थित महिलांचे स्वागत करण्यात आले. त्यानंतर डॉ. शशिकांत मुळे यांनी महिलांच्या आरोग्याशी संबंधित विविध विषयांवर मार्गदर्शन केले. विशेषतः महिलांमध्ये वाढत चाललेल्या हृदयविकारांच्या समस्यांबाबत त्यांनी सविस्तर माहिती दिली. हृदयविकाराची सुरुवातीची लक्षणे, त्याची कारणे, योग्य आहार, नियमित व्यायाम आणि वेळेवर आरोग्य तपासणी यांचे महत्त्व त्यांनी उदाहरणांसह स्पष्ट केले. तसेच तणावमुक्त जीवनशैली, संतुलित आहार आणि नियमित वैद्यकीय तपासणी केल्यास अनेक आजारांपासून बचाव होऊ शकतो, असेही त्यांनी सांगितले.
या आरोग्य तपासणी शिबिरात अनेक महिलांनी सहभाग घेत आपली आरोग्य तपासणी करून घेतली. कार्यक्रमाला प्रमुख अतिथी म्हणून रागिनी प्रतिष्ठानच्या कार्यवाहक रागिणी मुळे यांच्यासह आरती गायकवाड, सविता सोनवणे, सुमती मुळे, वैष्णवी मुळे, रेणका कुलकर्णी, लता पठारे, स्मिता कुलकर्णी, संजीवनी पखाले, संगिता जाधव आदी मान्यवर महिला उपस्थित होत्या.
या उपक्रमामुळे महिलांमध्ये आरोग्याबाबत सकारात्मक जागरूकता निर्माण झाली असून, भविष्यातही अशा प्रकारचे उपक्रम राबविण्याचा संकल्प प्रतिष्ठानच्या वतीने व्यक्त करण्यात आला.
कार्यक्रमाच्या शेवटी उपस्थित सर्व महिला व मान्यवरांचे आभार रागिनी प्रतिष्ठानच्या कार्यवाहक रागिणी मुळे यांनी मानले.
