Times O Maharashtra Desk : पुणे सीबीआय अधिकारी असल्याची बतावणी करून ‘डिजिटल अरेस्ट’ची भीती दाखवत पुण्यातील एका ८२ वर्षीय ज्येष्ठ नागरिकाची तब्बल १० कोटी ७४ लाख ६५ हजार रुपयांची ऑनलाइन फसवणूक केल्याप्रकरणी पुणे सायबर पोलिसांनी मोठी कारवाई केली आहे. या गुन्ह्यातील आणखी एका आरोपीला सोलापुरातून अटक करण्यात आली असून, आतापर्यंत या प्रकरणात एकूण तीन आरोपी गजाआड झाले आहेत. धक्कादायक बाब म्हणजे, फसवणुकीची रक्कम फिरवण्यासाठी आरोपींनी तब्बल ५,४३६ बँक खात्यांचा वापर केल्याचे तपासात निष्पन्न झाले आहे.
अशी केली फसवणूक (गुन्ह्याची पद्धत)
२३ जानेवारी ते ३१ जानेवारी २०२६ या काळात फसवणुकीचा हा धक्कादायक प्रकार घडला. सायबर भामट्यांनी प्रथम तक्रारदार ज्येष्ठ नागरिकाच्या आधारकार्डचा गैरवापर करून ‘नरेश गोयल’ या नावाने कॅनरा बँकेत बनावट खाते उघडले. त्यानंतर सीबीआय अधिकारी असल्याचे भासवून त्यांना फोन केला. ‘तुम्हाला आणि तुमच्या कुटुंबाला अटक होऊ शकते,’ अशी भीती घालून त्यातून सुरक्षितपणे बाहेर पडण्यासाठी आरोपींनी त्यांच्याकडे असलेली सर्व पुंजी वेगवेगळ्या बँक खात्यांवर ट्रान्सफर करण्यास भाग पाडले. अशा प्रकारे एकूण १० कोटी ७४ लाख ६५ हजार रुपयांचा गंडा घालण्यात आला.
तपासातील मुख्य धागेदोरे आणि अटक सत्राचा घटनाक्रम
पुण्यातून दोघांना अटक: सायबर पोलिसांनी तांत्रिक तपास करून यापूर्वी २२ फेब्रुवारी २०२६ रोजी हर्षद सुभाष धनतोले आणि समर्थ सुरेश देशमुख (दोघेही रा. कर्वेनगर, पुणे) यांना अटक केली होती. हर्षदने एटीएममधून काढलेली रोकड पाहिजे असलेला आरोपी रोहन जाधव (रा. सांगवी) याला दिल्याचे तपासात सांगितले होते. या दोघांच्या तपासात त्यांनी वापरलेल्या बँक खात्यांवरून देशभरात फसवणुकीचे तब्बल २९ गुन्हे (NCRP तक्रारी) उघडकीस आले आहेत.
सोलापुरातून तिसऱ्याला बेड्या: पाहिजे असलेल्या रोहन जाधवचा शोध घेत असताना, त्याचा सोलापूर येथील अमर शिवाजी अत्तरगी याच्याशी घनिष्ठ संबंध असल्याचे पोलिसांना समजले. फसवणुकीच्या रक्कमेपैकी ५ लाख रुपये अमर अत्तरगीच्या ‘सेंट्रल बँक ऑफ इंडिया’च्या खात्यात जमा झाले होते आणि ते चेकद्वारे काढण्यात आले होते. या माहितीच्या आधारे सायबर पोलिसांच्या पथकाने ५ मार्च रोजी सोलापूरच्या मोदीखाना परिसरात रात्रंदिवस सापळा रचून अमर अत्तरगी याला शिताफीने ताब्यात घेतले. गुन्ह्यातील त्याचा सहभाग स्पष्ट झाल्यानंतर ६ मार्च २०२६ रोजी त्याला अटक करण्यात आली.
तपासातील महत्त्वाचे आणि धक्कादायक खुलासे
फसवणूक झालेली रक्कम आरोपींनी तब्बल ५,४३६ बँक खात्यांमध्ये ट्रान्सफर करून फिरवली आहे.
पुणे सायबर पोलिसांनी तातडीने पावले उचलत यातील १ कोटी ३४ लाख रुपये गोठवण्यात (फ्रीझ करण्यात) यश मिळवले आहे.
यांनी केली कारवाई
ही धडक कारवाई पोलीस आयुक्त अमितेशकुमार, सह पोलीस आयुक्त रंजनकुमार शर्मा, अपर पोलीस आयुक्त पंकज देशमुख आणि आर्थिक व सायबर विभागाचे उपायुक्त विवेक मासाळ यांच्या मार्गदर्शनाखाली, पुणे सायबर पोलीस स्टेशनच्या वरिष्ठ पोलीस निरीक्षक स्वप्नाली शिंदे, पोलीस निरीक्षक संगिता देवकाते, सहायक पोलीस निरीक्षक अजित बडे व त्यांच्या पथकाने (पो.उप नि. भडेकर, साळवे, भोसले, राठोड व पांढरे) केली आहे.
