नागपुर-सावनेर (प्रतिनिधि राजू शिंदे) : नागपूर जिल्ह्यातील सावनेर तालुक्यात मध्यरात्री फोटोग्राफरवर हल्ला करून त्याचा महागडा कॅमेरा किट लुटल्याची धक्कादायक घटना समोर आली आहे. ही घटना केलवद-रामपुरी रोडवर घडली असून परिसरात भीतीचे वातावरण निर्माण झाले आहे.
मिळालेल्या माहितीनुसार, फिर्यादी प्रणय हिवरकर (वय २५) आणि त्यांचा सहकारी कॅमेरा ऑपरेटर गौरव गायधने हे दोघे लग्न सोहळ्याचे शूटिंग पूर्ण करून सौसर तालुक्यातील बोरगाव येथून आपल्या गावी परतत होते. रात्री सुमारे १२.३० वाजण्याच्या सुमारास, ते केलवद-रामपुरी रोडवर असताना फिकट काळ्या रंगाच्या टाटा अल्ट्रोज (एमपी २८ झेडए ६१३५) या कारमधून चार अज्ञात इसम उतरले आणि त्यांनी दोघांचा पाठलाग सुरू केला.
या दरम्यान, आरोपींनी मोटारसायकल अडवून त्यांना धमकावले. त्यापैकी एका आरोपीने चाकूचा धाक दाखवत प्रणय हिवरकर यांची बॅग हिसकावून घेतली आणि सर्वजण घटनास्थळावरून फरार झाले. या बॅगेमध्ये कॅनन कंपनीचे Canon R आणि Canon R6 असे महागडे कॅमेरा किट होते.
घटनेनंतर पीडितांनी केलवद पोलीस ठाण्यात तक्रार दाखल केली असून पोलीस आरोपींचा शोध घेत आहेत. या घटनेमुळे परिसरातील नागरिकांमध्ये भीतीचे वातावरण निर्माण झाले असून रात्रीच्या सुरक्षेबाबत प्रश्नचिन्ह उपस्थित झाले आहे.
