Times Of MaharashtraDesk पुणे : महानगरपालिका मधील अतिक्रमण विभागाचा कारभार पुन्हा एकदा वादाच्या भोवऱ्यात सापडला आहे. विभागातील प्रभारी उपायुक्त रमेश शेलार यांच्यावर पत्रकारांना गुन्हा दाखल करण्याची धमकी दिल्याचा गंभीर आरोप समोर आला आहे.
मिळालेल्या माहितीनुसार, एका पत्रकार तक्रारदाराने महानगरपालिकेच्या कामकाजातील कथित त्रुटींबाबत लेखी तक्रार सादर केली होती. या तक्रारीवर कोणती कारवाई करण्यात आली, याबाबत माहिती विचारण्यासाठी पत्रकारांनी संबंधित अधिकाऱ्यांशी संपर्क साधला. मात्र, यावेळी प्रभारी उपायुक्तांनी कनिष्ठ अभियंत्यांना “पत्रकारांवर गुन्हा दाखल करा” अशा आशयाचे निर्देश दिल्याचा आरोप आहे.
या घटनेमुळे लोकशाहीच्या चौथ्या स्तंभावर दबाव आणण्याचा प्रयत्न होत असल्याची भावना पत्रकारांमध्ये व्यक्त केली जात आहे. या पार्श्वभूमीवर हिंदी मराठी पत्रकार संघ यांच्याकडून तीव्र निषेध व्यक्त करण्यात आला असून, संबंधित अधिकाऱ्यांविरोधात आंदोलनाचा इशारा देण्यात आला आहे.
संघटनेचे अध्यक्ष शेख यांनी सांगितले की, पत्रकारांनी केवळ सार्वजनिक हितासाठी माहिती विचारली असताना त्यांना गुन्ह्याची धमकी देणे हे अत्यंत गंभीर आहे. या प्रकरणाची उच्चस्तरीय चौकशी होऊन दोषींवर तातडीने कारवाई झाली पाहिजे.
दरम्यान, या संपूर्ण प्रकरणावर संबंधित अधिकारी रमेश शेलार यांची अधिकृत भूमिका अद्याप समोर आलेली नाही. तसेच, महानगरपालिका प्रशासनाकडूनही कोणतीही अधिकृत प्रतिक्रिया देण्यात आलेली नाही.
कायदेशीर तज्ज्ञांच्या मते, जर सरकारी अधिकाऱ्यांकडून पत्रकारांना धमकावण्याचा प्रकार सिद्ध झाला, तर तो माहितीच्या अधिकाराचे उल्लंघन आणि अभिव्यक्ती स्वातंत्र्यावर गदा मानला जाऊ शकतो. अशा प्रकरणांमध्ये प्रशासकीय चौकशी, शिस्तभंग कारवाई किंवा अन्य कायदेशीर पावले उचलली जाऊ शकतात.
क्रमशः लवकरच रमेश शेलार यांच्या बद्दल मोठी माहिती येणार समोर…
