Times of Maharashtra Desk: पंतप्रधान नरेंद्र मोदी यांच्या हस्ते आज राम मंदिराच्या मुख्य शिखरावर विधिवत पूजेनंतर पवित्र धर्मध्वज फडकवण्यात आला. प्राणप्रतिष्ठा सोहळ्यानंतरचा हा मंदिरातील सर्वात महत्त्वाचा सोहळा मानला जात आहे. या ऐतिहासिक सोहळ्यासाठी अयोध्येत अभूतपूर्व उत्साह पाहायला मिळाला. ध्वजारोहण सोहळ्यापूर्वी पंतप्रधान नरेंद्र मोदी यांनी अयोध्येत एक भव्य रोड शो केला. यावेळी रस्त्याच्या दुतर्फा उभ्या असलेल्या हजारो भाविकांनी, स्थानिक नागरिकांनी आणि साधू-संतांनी पंतप्रधानांवर पुष्पवृष्टी केली. संपूर्ण वातावरण जय श्री रामच्या जयघोषाने आणि भक्तीभावाने भारलेले होते. कडेकोट सुरक्षा व्यवस्थेत पार पडलेल्या या रोड शोमध्ये नागरिकांचा उत्साह शिगेला पोहोचला होता. पंतप्रधानांनी मंदिराच्या गर्भगृहात जाऊन रामलल्लांचे दर्शन घेतले आणि त्यानंतर मुख्य शिखरावर विधिवत पूजेनंतर धर्मध्वज स्थापित केला. हा ध्वज केवळ मंदिराची शोभा वाढवणारा नसून तो सनातन धर्माच्या पुनर्स्थापनेचे प्रतीक मानला जात आहे.
काय आहेत या ध्वजाची वैशिष्ट्ये?
राम मंदिराच्या शिखरावर फडकवण्यात आलेल्या या ध्वजावर काही विशेष चिन्हे अंकित आहेत, ज्यांचा खोलवर आध्यात्मिक अर्थ आहे.
१. सूर्य : प्रभू श्रीराम हे सूर्यवंशी होते. ध्वजावर अंकित असलेला सूर्य हे सूर्यवंशाचे प्रतीक आहे. तसेच ते ऊर्जा, तेज आणि अंधारावर प्रकाशाच्या विजयाचे प्रतिनिधित्व करते.
२. ओम : ओम हा हिंदू धर्मातील अनादी आणि अनंत नाद मानला जातो. हे विश्वाचे मूळ आणि आध्यात्मिक पूर्णत्वाचे प्रतीक आहे.
३. कोविदार वृक्ष : ध्वजावर कोविदार वृक्षाचे चित्र आहे. रामायण काळात आणि अयोध्या राजघराण्यात या वृक्षाला विशेष महत्त्व होते. हे चिन्ह पर्यावरणाशी असलेले मानवाचे नाते आणि समृद्धी दर्शवते.
या सोहळ्याच्या निमित्ताने उत्तर प्रदेशातील बदलत्या चित्रावरही प्रकाश टाकण्यात आला. अयोध्या आता केवळ एक तीर्थक्षेत्र राहिले नसून ते भारताच्या धार्मिक पर्यटनाचे आणि विकासाचे प्रमुख केंद्र बनत आहे.अयोध्येतील विमानतळ, रेल्वे स्टेशन आणि महामार्गांच्या विकासामुळे कनेक्टिव्हिटी सुधारली आहे.धार्मिक पर्यटनामुळे स्थानिक अर्थव्यवस्थेला मोठी चालना मिळाली असून, रोजगाराच्या नवीन संधी उपलब्ध होत आहेत असे देखील त्यांनी नमूद केले.
