परभणी (प्रतिनिधी अनिल शेटे) : पालम तालुक्यातील रावराजूर येथे विश्वरत्न महामानव डॉ. बाबासाहेब आंबेडकर यांच्या १३५ व्या जयंतीनिमित्त (दि. १४ एप्रिल) विविध कार्यक्रमांचे उत्साहात आयोजन करण्यात आले.
कार्यक्रमाच्या पहिल्या सत्रात एक दिवसीय योग शिबिराचे आयोजन करण्यात आले होते. यावेळी उपस्थित नागरिकांनी १३५ सूर्यनमस्कार घालून बाबासाहेबांना मानवंदना अर्पण केली.
हे योग शिबिर पतंजली योग समिती पालम, श्री नरेंद्र गिरी माध्यमिक विद्यालय, ग्रामपंचायत कार्यालय तसेच सार्वजनिक भीम जन्मोत्सव समिती रावराजूर यांच्या संयुक्त विद्यमाने पार पडले. कार्यक्रमाची सुरुवात डॉ. बाबासाहेब आंबेडकर यांच्या प्रतिमा पूजन, दीपप्रज्वलन आणि शंखनादाने करण्यात आली.
यानंतर सहभागी नागरिकांना सूक्ष्म व्यायाम, योगिक जॉगिंग, विविध योगासने तसेच सूर्यनमस्काराचे प्रशिक्षण देण्यात आले.
या शिबिरात योग शिक्षक प्रकाश डिकळे, व्यंकट शिंदे, शिवाजीराव चौधरी, शाम कवटकवार, विष्णुदास शिंदे आणि धनंजय शिंदे यांनी मार्गदर्शन केले. तसेच सार्वजनिक जयंती समितीचे अध्यक्ष सतीश गोबाडे, याकुब सय्यद, इर्शाद फारुकी, गोपाळ खंदारे, मिथुन गोबाडे, गोविंदराव शिंदे, विशाल साळवे, उन्मेष साळवे आदी पदाधिकारी व ग्रामस्थ मोठ्या संख्येने उपस्थित होते.
याचप्रमाणे श्री नरेंद्र गिरी माध्यमिक विद्यालय रावराजूर येथे मुख्याध्यापक पवार, शिक्षक बिरादार, राठोड, काळे, चलवाड आदींनी भारतमाता व डॉ. बाबासाहेब आंबेडकर यांच्या प्रतिमांचे पूजन करून अभिवादन केले.
कार्यक्रमाचे सूत्रसंचालन व आभार प्रदर्शन शिक्षक प्रकाश डिकळे यांनी केले. योग शिबिरात शिवाजी चौधरी, शाम कवटकवार व प्रकाश डिकळे यांनी योगाचे महत्त्व पटवून दिले.
हा कार्यक्रम यशस्वी करण्यासाठी सर्व आयोजक, पदाधिकारी व ग्रामस्थांनी मोलाचे सहकार्य केले.
