बुलढाणा (प्रतिनिधी अनिल वायाळ) : जिल्ह्यातील मेहकरजवळ समृद्धी महामार्गावर एक भीषण अपघात घडला असून या दुर्घटनेत दीड वर्षीय चिमुकल्याचा दुर्दैवी मृत्यू झाला आहे, तर 25 प्रवासी जखमी झाले आहेत. जखमींपैकी सहा जणांची प्रकृती गंभीर असल्याची माहिती समोर आली आहे.
मिळालेल्या माहितीनुसार, मुंबईहून पुसदकडे जाणारी खाजगी प्रवासी बस सकाळी सुमारे सहाच्या सुमारास मेहकरजवळील फर्दोपुर टोल नाक्याजवळ अपघातग्रस्त झाली. प्रत्यक्षदर्शी आणि प्रवाशांच्या म्हणण्यानुसार, बस चालक आणि वाहक मोबाईलवर रील बनवण्यात व्यस्त होते. यामुळे चालकाचे वाहनावरील नियंत्रण सुटले आणि बस दुसऱ्या कारवर आदळली. या धडकेत कारचेही मोठे नुकसान झाले आहे.
अपघातानंतर घटनास्थळी मोठा गोंधळ उडाला. स्थानिकांनी तात्काळ मदतकार्य सुरू करत जखमींना मेहकर येथील ग्रामीण रुग्णालयात हलवले. मात्र, रुग्णालयात जवळपास एक तास डॉक्टर उपलब्ध नसल्याने जखमींच्या नातेवाईकांनी तीव्र संताप व्यक्त करत आक्रोश केला.
या अपघातात एका लहान मुलाचा मृत्यू झाल्याने परिसरात हळहळ व्यक्त होत आहे. गंभीर जखमींना पुढील उपचारासाठी खाजगी रुग्णालयात हलवण्यात आले आहे. पोलिसांनी घटनास्थळी धाव घेत तपास सुरू केला असून, अपघातास जबाबदार असलेल्या चालक आणि वाहकाविरुद्ध कारवाई होण्याची शक्यता आहे.
ही घटना पुन्हा एकदा वाहन चालवताना निष्काळजीपणा आणि मोबाईल वापराचे गंभीर परिणाम अधोरेखित करते.
