धनंजय देवंग्रे ( लातूर शहर प्रतिनिधी ) : शिरूर अनंतपाळ येथील नगरपंचायतीमध्ये विविध विषय समित्या व स्थायी समितीच्या सभापती पदासाठी आज दुपारी 12.30 वाजता विशेष सभेचे आयोजन करण्यात आले होते. नगरपंचायतीच्या सभागृहात पार पडलेल्या या बैठकीत सर्व समित्यांच्या सभापती व सदस्यांची अधिकृत निवड जाहीर करण्यात आली. निवड प्रक्रिया शांततेत आणि नियमानुसार पार पडल्याने प्रशासनाने समाधान व्यक्त केले.
नगरपंचायतीच्या कारभारात पारदर्शकता, विकासकामांना गती आणि नागरिकांच्या मूलभूत सुविधांवर भर देण्याच्या दृष्टीने या समित्यांची भूमिका अत्यंत महत्त्वाची मानली जाते. नव्याने निवड झालेल्या पदाधिकाऱ्यांवर शहर विकासाची मोठी जबाबदारी सोपविण्यात आली आहे.
विषय समित्यांचे सभापती पुढीलप्रमाणे :
सार्वजनिक बांधकाम समिती – श्री. बरगे ओमप्रकाश मारोती, स्वच्छता, वैद्यक व सार्वजनिक आरोग्य समिती – श्री. काळे अनंत जनार्धन, पाणी पुरवठा व जलनिस्सारण समिती – श्री. मुदाळे वीरभद्र हणमंत, नियोजन व विकास समिती – सौ. संभाळे श्रीदवी माधव, महिला व बालकल्याण समिती – सौ. शिंदे शामल दत्ता, उपसभापती – सौ. खरटमोल कुसुम माधव, स्थायी समिती सभापती श्रीमती चंद्रकला शिवाजी शिवणे, या निवडीनंतर नगरपंचायतीच्या कारभाराला नवे नेतृत्व लाभले आहे. विशेषतः पाणीपुरवठा, स्वच्छता व्यवस्था, आरोग्य सुविधा, रस्ते विकास आणि महिला-बालकल्याण योजनांवर भर दिला जाणार असल्याचे संकेत मिळत आहेत.
सभेत उपस्थित नगरसेवकांनी शहरातील प्रलंबित कामे तातडीने मार्गी लावण्याचा निर्धार व्यक्त केला. तसेच नागरिकांच्या तक्रारींचे निवारण वेगाने करण्यासाठी समित्यांनी समन्वयाने काम करण्याचे आवाहन करण्यात आले.
स्थानिक नागरिकांनीही नव्याने निवडलेल्या पदाधिकाऱ्यांकडून विकासकामांना गती मिळेल, शहर स्वच्छ व सुबक होईल आणि मूलभूत सुविधांमध्ये सुधारणा होईल, अशी अपेक्षा व्यक्त केली आहे.
शहराच्या सर्वांगीण विकासासाठी ही समिती रचना महत्त्वाची ठरणार असून आगामी काळात नगरपंचायतीच्या कामकाजाकडे नागरिकांचे लक्ष लागून राहणार आहे
