जळगाव (प्रतिनिधी विनोद पवार) : अखिल भारतीय मराठी चित्रपट महामंडळाच्या आगामी पंचवार्षिक निवडणुकीच्या पार्श्वभूमीवर नाशिक येथे कलाकार, निर्माते, दिग्दर्शक आणि सभासदांचा महत्त्वपूर्ण मेळावा उत्साहात पार पडला. या मेळाव्यात मराठी चित्रपटसृष्टीच्या सर्वांगीण विकासासाठी सक्षम आणि दूरदृष्टी असलेल्या नेतृत्वाची गरज असल्याचे मत उपस्थितांनी व्यक्त केले.
मेळाव्यात बोलताना मेहराज भोसले यांनी मराठी कलाकारांचा सन्मान, त्यांच्या हक्कांचे संरक्षण आणि विविध प्रलंबित प्रश्नांच्या सोडवणुकीसाठी ‘सक्षम पॅनेल’ला पाठिंबा देण्याचे आवाहन केले. मराठी चित्रपटसृष्टीला नवी दिशा आणि नवसंजीवनी देण्यासाठी सर्व घटकांनी एकत्रितपणे काम करणे आवश्यक असल्याचे त्यांनी यावेळी सांगितले.
बैठकीदरम्यान आगामी निवडणुकीसंदर्भात विविध विषयांवर सविस्तर चर्चा करण्यात आली. कलाकार, तंत्रज्ञ, निर्माते आणि सभासदांच्या अडचणी, महामंडळाच्या कामकाजातील सुधारणा, तसेच भविष्यातील धोरणे आणि विकासात्मक उपक्रमांवर विचारमंथन करण्यात आले.
या मेळाव्यास उत्तर महाराष्ट्रातील नाशिक, जळगाव, धुळे, अहमदनगर, संगमनेर आदी भागांतील मोठ्या संख्येने सभासद उपस्थित होते. मराठी चित्रपटसृष्टीच्या उन्नतीसाठी संघटितपणे कार्य करण्याचा निर्धार उपस्थितांनी व्यक्त केला.
कार्यक्रमास मेहराज भोसले, रमेश तलवारे, सुनील लंगे, श्याम लोंढे, रफिक सय्यद, रोशन जाधव, नितेश दारकांडे, ललित निकम, सचिन निकम, सत्यशिल पवार, अरुण गिते, अमित मायकेकर, सतीश वाणी, सुनील गावंडे यांच्यासह अनेक कलाकार, निर्माते, दिग्दर्शक आणि तंत्रज्ञ उपस्थित होते.
मेळाव्याच्या शेवटी उपस्थित मान्यवरांनी आयोजकांचे आभार मानले. तसेच आगामी निवडणुकीत सभासदांनी मोठ्या संख्येने मतदान करून सक्षम नेतृत्वाला पाठिंबा द्यावा, असे आवाहन करण्यात आले.
