दौंड (प्रतिनिधी-मयुर साळवे)
पारगाव येथे 28 ऑगस्ट 2025 रोजी संपन्न झालेल्या दौंड तालुकास्तरीय शालेय कुस्ती स्पर्धेत शेठ ज्योतीप्रसाद विद्यालयातील तीन विद्यार्थ्यांनी घवघवीत यश संपादन करत प्रथम क्रमांक पटकावला. विद्यालयाचे प्राचार्य श्री. नवनाथ कदम यांनी ही माहिती दिली.
कमययोगी कुस्ती केंद्र, पारगाव येथे झालेल्या या स्पर्धेत 68 किलो वजन गटात कु. गणेश जाधव, 65 किलो वजन गटात कु. कृष्णकांत जाधवर तर 50 किलो वजन गटात कुमारी ज्ञानेश्वरी देशमुख यांनी उत्कृष्ट खेळ सादर करत आपापल्या गटात प्रथम क्रमांक मिळविला. या तिन्ही खेळाडूंनी दमदार कामगिरी करत पुणे जिल्हास्तरीय कुस्ती स्पर्धेसाठी पात्रता मिळविली असून आता ते इंदापूर येथे होणाऱ्या जिल्हास्तरीय कुस्ती स्पर्धेत विद्यालयाचे प्रतिनिधित्व करणार आहेत.
या यशस्वी खेळाडूंचे क्रीडा शिक्षक श्री. संताजी आटोळे व श्री. गुरुनाथ कोळी यांनी मार्गदर्शन केले. त्यांच्या या यशाबद्दल संस्थेचे मानद सचिव माननीय प्रेमसुखजी कटारिया, चेअरमन श्री. विक्रमशेठजी कटारिया, विद्यालयाचे प्राचार्य श्री. नवनाथ कदम, उप प्राचार्य श्री कृष्ण देवकर,पर्यवेक्षक श्री. रामदास भोले, पर्यवेक्षिका सौ. कुंतकला चौदार तसेच सर्व शिक्षकवृंद यांनी खेळाडूंचे अभिनंदन केले व पुढील वाटचालीस शुभेच्छा दिल्या.
या विजयामुळे विद्यालयात आनंदाचे वातावरण असून, जिल्हास्तरीय स्पर्धेतही विद्यार्थ्यांकडून उत्तम कामगिरीची अपेक्षा व्यक्त होत आहे.
