शिरपूर (प्रतिनिधी तुषार शेटे) : तालुक्यातील खैरखुटी येथे १९ एप्रिल रोजी रात्री घडलेल्या धक्कादायक घटनेत, पत्नीने फोन न केल्याच्या रागातून पतीने तिचा दगडाने खून केल्याची घटना समोर आली आहे. या प्रकरणी तालुका पोलिसांनी संशयित पतीला अटक केली आहे.
ललिता सुनील पावरा (वय २५) असे मृत महिलेचे नाव असून, तिचा पती सुनील सायमल पावरा (वय ३०) यानेच हा खून केल्याचे उघड झाले आहे. काही दिवसांपासून बाहेरगावी गेलेल्या पतीला पत्नीने फोन न केल्याने त्याच्या मनात संशय निर्माण झाला. घरी परतल्यानंतर या कारणावरून दोघांमध्ये वाद झाला. वाद विकोपाला गेल्यावर सुनीलने दगडाने वार करत पत्नीची हत्या केली.
घटनेची माहिती मिळताच सांगवी पोलिस ठाण्याचे निरीक्षक जयपाल हिरे व पथकाने घटनास्थळी धाव घेत संशयिताला अटक केली. त्याच्याविरोधात गुन्हा दाखल करण्यात आला असून उपनिरीक्षक मनोज कचरे पुढील तपास करत आहेत.
या कारवाईत पोलिस अधीक्षक श्रीकांत धिवरे, अपर अधीक्षक अजय देवरे, उपअधीक्षक विश्वजित जाधव यांच्या मार्गदर्शनाखाली पोलिस पथकाने काम केले.
