Times of Maharashtra Desk, Pune: विमाननगरमधील उच्चभ्रू वस्ती असलेल्या कोणार्क नगर, लेन क्रमांक १३ परिसरात नियम धाब्यावर बसवून निवासी रो-हाऊसेसचा व्यावसायिक वापर होत असल्याचा धक्कादायक प्रकार उघडकीस आला होता. या अनधिकृत वापरामुळे स्थानिक रहिवाशांना मोठा त्रास सहन करावा लागत होता, आता मात्र पुणे महानगरपालिकेने काही आस्थापनांना नोटिसा बजावल्याची विश्वसनीय माहिती समोर आली आहे.
काय आहे नेमकं प्रकरण?
मिळालेल्या माहितीनुसार, कोणार्क नगर परिसरातील रो-हाऊसेस मूळतः निवासी वापरासाठी मंजूर आहेत. मात्र, या ठिकाणी अनेक नामांकित रेस्टॉरंट्स आणि कॅफे सुरू करण्यात आले आहेत. स्थानिक नागरिकांनी दिलेल्या माहितीनुसार, यामध्ये प्रामुख्याने खालील आस्थापनांचा समावेश आहे:
Yeti & The Monk, After Hours, Coffee Nation, The Nook Diner, Where Else Diner, Dohiti Bake House
नियमांची सर्रास पायमल्ली
झोनिंग नियमांनुसार निवासी क्षेत्रात कोणत्याही व्यावसायिक उपक्रमासाठी विशेष परवानगी घेणे अनिवार्य असते. मात्र, या आस्थापनांनी निवासी वापराच्या जागेवर रेस्टॉरंट्स थाटून नियमांचे उल्लंघन केल्याचा आरोप आहे. एवढेच नाही तर, विकास नियंत्रण नियमांनुसार ‘फ्रंट’ आणि ‘साईड मार्जिन’ मोकळे ठेवणे बंधनकारक असताना, त्या मोकळ्या जागेत शेड्स, टेबल-खुर्च्या आणि इतर बांधकामे करून अतिक्रमण करण्यात आले होते.
कायद्याचा बडगा: MRTP अंतर्गत कारवाईची टांगती तलवार
महाराष्ट्र प्रादेशिक नियोजन व नगररचना अधिनियम, १९६६ (MRTP Act) नुसार, मंजूर नकाशाच्या व्यतिरिक्त केलेला वापर किंवा अनधिकृत बांधकाम हा गंभीर गुन्हा मानला जातो. या कायद्यांतर्गत:
संबंधित मालकाला ‘कारणे दाखवा’ नोटीस बजावणे.
नियमबाह्य बांधकामावर दंड आकारणे.
अनधिकृत वापर त्वरित थांबवण्याचे आदेश देणे.
नियमभंग सुरूच राहिल्यास मालमत्ता सील करणे.
अशा कठोर कारवायांचे अधिकार महापालिका प्रशासनाला आहेत. सूत्रांच्या माहितीनुसार, पीएमसीने आधीच यातील काही आस्थापनांना नोटिसा धाडल्या असून प्रशासकीय स्तरावर चौकशी सुरू झाली आहे.
रहिवाशांच्या तक्रारी आणि समस्या
स्थानिक रहिवाशांनी ‘टाईम्स ऑफ महाराष्ट्र’कडे आपल्या तक्रारी मांडताना सांगितले की, “निवासी भागात अशा व्यावसायिक हालचाली वाढल्यामुळे आमची शांतता भंग पावली आहे. रात्री उशिरापर्यंत चालणारा गोंगाट म्हणजेच ध्वनीप्रदूषण, येणाऱ्या ग्राहकांमुळे होणारी वाहतूक कोंडी आणि पार्किंगचा प्रश्न यामुळे जगणे कठीण झाले आहे.”
टाईम्स ऑफ महाराष्ट्रच्या बातमीचा ‘इम्पॅक्ट’
महापालिकेने नोटिसा बजावल्या असल्या तरी अद्याप अधिकृतपणे माहिती जाहीर केलेली नाही. मनपा प्रशासन यावर कोणती ठोस कारवाई करते, याकडे सर्वांचे लक्ष लागले आहे. ‘टाईम्स ऑफ महाराष्ट्र’ या प्रकरणाचा सखोल पाठपुरावा करत असून, जोपर्यंत अनधिकृत वापराला चाप लागत नाही, तोपर्यंत आमचे लक्ष यावर राहील.
