कॅन्सरग्रस्त रुग्णांच्या मदतीसाठी विद्यार्थ्यांचा पुढाकार; १०० हून अधिक रक्तदात्यांचा उत्स्फूर्त प्रतिसाद
Times of Maharashtra Desk, Pune: भारतीय संविधान दिन आणि २६ नोव्हेंबर रोजी मुंबईवर झालेल्या दहशतवादी हल्ल्यात शहीद झालेले जवान व निष्पाप नागरिकांच्या स्मृतीला अभिवादन करण्यासाठी, आज सावित्रीबाई फुले पुणे विद्यापीठात भव्य रक्तदान शिबिराचे आयोजन करण्यात आले होते. या शिबिरात विद्यापीठातील विद्यार्थी, प्राध्यापक आणि शिक्षकेतर कर्मचाऱ्यांनी मोठ्या संख्येने सहभाग नोंदवत सामाजिक बांधिलकी जपली.
आज बुधवार, दिनांक २६ नोव्हेंबर २०२५ रोजी विद्यापीठाच्या रिफेक्ट्री वरील सभागृहात पार पडलेल्या या शिबिरास सावित्रीबाई फुले पुणे विद्यापीठाचे राज्यपाल नियुक्त सिनेट सदस्य कृष्णा भंडलकर आणि शिवत्व प्रतिष्ठानचे कार्याध्यक्ष अमरजीत सोनवणे उपस्थित होते. तसेच इतर विविध संघटनांचे प्रतिनिधीही यावेळी उपस्थित होते. विद्यापीठातील तरुणांनी या उपक्रमाला उत्स्फूर्त प्रतिसाद दिला, ज्यामुळे शिबिराचे वातावरण अत्यंत उत्साहवर्धक होते.
या रक्तदान शिबिराचे विशेष वैशिष्ट्य म्हणजे जमा झालेले रक्त हे समाजातील गरजवंतांसाठी वापरले जाणार आहे. याबद्दल अधिक माहिती देताना प्रतिष्ठानचे अध्यक्ष दत्ता व्हडगर पाटील म्हणाले की, “या शिबिराच्या माध्यमातून १०० हून अधिक रक्तदात्यांनी रक्तदान केले आहे. येथे संकलित केलेले रक्त समाजातील आर्थिकदृष्ट्या दुर्बल असलेल्या कॅन्सरग्रस्त रुग्णांच्या उपचारासाठी पूर्णपणे मोफत देण्यात येणार आहे.”
हे शिबिर यशस्वी करण्यासाठी प्रतिष्ठानच्या अनेक सदस्यांनी सक्रिय सहभाग घेतला. यामध्ये प्रामुख्याने आदित्य डुंबरे, अभिषेक पांढरे, भारत सुरडकर, अथर्व इंगळे, ऋषिकेश गोलांडे, धनंजय विसपुते आणि इतर सहकाऱ्यांनी विशेष परिश्रम घेतले. दहशतवादाचा निषेध करत असतानाच, रक्ताच्या नात्याने समाज जोडण्याचा हा स्तुत्य उपक्रम विद्यापीठ परिसरात चर्चेचा आणि कौतुकाचा विषय ठरला आहे.
