Times of Maharashtra Desk , Delhi Court Blast: लाल किल्ला बॉम्बस्फोट प्रकरणातील अटक केलेल्या दोन आरोपींना एनआयएने बुधवारी २६ नोव्हेंबर २०२५ दिल्ली न्यायालयात हजर केले. आरोपी शोएब आणि आमिर रशीद अली यांना प्रधान जिल्हा आणि सत्र न्यायाधीश अंजू बजाज चंदना यांच्यासमोर हजर करण्यात आले होते. न्यायालयाने या प्रकरणातील आरोपी शोएबला १० दिवसांची एनआयए कोठडी सुनावली आहे . एनआयएने आमिरला आणखी सात दिवसांची कोठडी सुनावण्याची विनंती केली होती. शोएबवर दहशतवादी उमरला आश्रय दिल्याचा आरोप आहे.मिळालेल्या माहिती नुसार आमिर रशीद हा या प्रकरणातील पहिला आरोपी आहे आणि शोएब हा सातवा आरोपी आहे.
लाल किल्ल्याजवळ स्फोटकांनी भरलेली कार चालवणाऱ्या डॉ. उमर उन नबीला आश्रय दिल्याच्या आरोपाखाली एनआयएने शोएबला फरिदाबाद येथून अटक केली होती. एनआयएच्या म्हणण्यानुसार, फरिदाबादमधील धौज येथील रहिवासी शोएब याने दहशतवादी उमरला लॉजिस्टिक सपोर्ट पुरवला होता. जम्मू पोलिसांनी तो व्हाइट कॉलर टेरर मॉड्यूल भाग म्हणून घोषित केले आहे. एनआयएने म्हटले आहे की, “तपास एजन्सी आत्मघातकी हल्ल्याशी संबंधित विविध धाग्यांवर काम करत आहे आणि या भयानक हल्ल्यात सहभागी असलेल्या इतर व्यक्तींना ओळखण्यासाठी आणि त्यांना अटक करण्यासाठी संबंधित पोलिस दलांशी समन्वय साधून विविध राज्यांमध्ये शोध घेत आहेत.
तपास यंत्रणेच्या म्हणण्यानुसार, शोएबने उमरला केवळ त्याच्या घरात आश्रय दिला नाही तर त्याला स्फोटके पोहोचवण्यास, सुरक्षित मार्ग प्रदान करण्यास आणि पळून जाण्यास मदत केली. त्याच्या ठिकाणाच्या आणि कॉल डिटेल्सच्या तपासात अनेक धक्कादायक खुलासे समोर आले आहेत. शोएबचा संबंध एखाद्या मोठ्या दहशतवादी नेटवर्कशी असण्याची शक्यता एनआयएला आहे.
एनआयएने देशभरातील अनेक राज्यांमध्ये छापे टाकले आहेत. पंजाब, हरियाणा, उत्तर प्रदेश आणि राजस्थानमध्ये एकाच वेळी शोध मोहीम सुरू करण्यात आली आहे. तसेच सर्व राज्यात सतर्क राहण्याचा इशारा देखील देण्यात आला आहे.
