Times of Maharashtra Desk: शासकीय कोट्यातील सदनिका गैरव्यवहार प्रकरणी राज्याचे क्रीडामंत्री माणिकराव कोकाटे यांच्या अडचणीत वाढ झाली आहे. प्रथम वर्ग न्यायालयाने सुनावलेली दोन वर्षांच्या कारावासाची आणि दंडाची शिक्षा नाशिक जिल्हा सत्र न्यायालयाने कायम ठेवली आहे. जिल्हा सत्र न्यायाधीश पी. एम. बदर यांनी हा निर्णय दिला.मुख्यमंत्री कोट्यातून दिल्या जाणाऱ्या अल्प उत्पन्न गटासाठीच्या सदनिकांसाठी बनावट कागदपत्रे सादर केल्याप्रकरणी माणिकराव कोकाटे आणि त्यांचे भाऊ विजय कोकाटे यांना प्रत्येकी दोन वर्षांचा कारावास आणि 50 हजार रुपयांचा दंड ठोठावण्यात आला आहे. यापूर्वी प्रथम वर्ग न्यायालयाने ही शिक्षा सुनावली होती. त्या निर्णयाविरोधात कोकाटे यांनी जिल्हा सत्र न्यायालयात अपील दाखल केले होते. मात्र, सत्र न्यायालयाने अपील फेटाळून लावत मूळ शिक्षा कायम ठेवली आहे.
दरम्यान, प्रथम वर्ग न्यायालयाच्या निर्णयानंतर विरोधकांकडून माणिकराव कोकाटे यांच्या राजीनाम्याची मागणी होत होती. या निकालामुळे त्यांच्या राजकीय अडचणी आणखी वाढल्या आहेत.गेल्या काही महिन्यांपासून माणिकराव कोकाटे विविध कारणांमुळे चर्चेत आहेत. विधिमंडळ अधिवेशनादरम्यान मोबाईलवर रम्मी खेळतानाचा व्हिडिओ व्हायरल झाल्यानंतर त्यांनी स्पष्टीकरण दिले होते. त्यानंतर त्यांच्याकडील कृषिमंत्रीपदाचा पदभार काढून घेण्यात येऊन त्यांना क्रीडामंत्रीपदाची जबाबदारी देण्यात आली होती. मात्र, आता न्यायालयाच्या निर्णयामुळे पुन्हा एकदा ते अडचणीत सापडले आहेत.
काय आहे सदनिका गैरव्यवहार प्रकरण?
नाशिक शहरातील कॅनडा कॉर्नर परिसरातील ‘व्ह्यू अपार्टमेंट’मध्ये सुमारे 30 वर्षांपूर्वी मुख्यमंत्री कोट्यातून अल्प उत्पन्न गटासाठी सदनिका देण्यात आल्या होत्या. माणिकराव कोकाटे, त्यांचे भाऊ विजय कोकाटे, पोपट सोनवणे आणि प्रशांत गोवर्धने यांनी या सदनिका मिळवल्या होत्या. मात्र, हे सर्वजण अल्प उत्पन्न गटातील नसतानाही बनावट कागदपत्रांच्या आधारे सदनिका लाटल्याचा आरोप आहे.तत्कालीन राज्यमंत्री तुकाराम दिघोळे यांनी या प्रकरणी तक्रार केल्यानंतर जिल्हा प्रशासनाने चौकशी केली होती. चौकशीनंतर दोष सिद्ध झाल्याने न्यायालयाने संबंधितांना शिक्षा सुनावली आहे.या निर्णयामुळे माणिकराव कोकाटे यांच्या राजकीय भवितव्यावर प्रश्नचिन्ह निर्माण झाले असून पुढील कायदेशीर आणि राजकीय घडामोडींकडे सर्वांचे लक्ष लागले आहे
