Times of Maharashtra Desk: पुणे महानगरपालिकेच्या निवडणुकीच्या पार्श्वभूमीवर भाजप आणि मुख्यमंत्री एकनाथ शिंदे यांच्या शिवसेनेमधील युती कधी जाहीर होणार, जागावाटपाचा फॉर्म्युला काय असणार आणि उमेदवारांची अधिकृत यादी कधी प्रसिद्ध होणार, याकडे सर्वांचे लक्ष लागले आहे. मात्र युतीबाबत अद्याप स्पष्टता नसतानाच भाजपने आपली तयारी पूर्ण वेगाने सुरू केल्याचे चित्र आहे.
भाजपने मध्यरात्री काही ठराविक उमेदवारांना एबी फॉर्म वितरित करत प्रचाराला सुरुवात करण्याचे निर्देश दिल्याची माहिती सूत्रांकडून मिळत आहे. पुण्यातील १६५ जागांपैकी भाजपने याआधीच सुमारे १०० जागांवर आपली दावा निश्चित केला होता. त्यानुसार संभाव्य उमेदवारांची यादीही तयार करण्यात आली होती. आता त्याच यादीतील ६० ते ८० उमेदवारांना एबी फॉर्म देण्यात आल्याचे समजते. एकीकडे भाजप–शिवसेना युतीबाबत संभ्रम असताना आणि जागावाटपावरून चर्चा सुरू असतानाच भाजपने ‘सेफ गेम’ खेळत आपले पक्के उमेदवार मैदानात उतरवले आहेत. यामुळे आगामी काळात राजकीय हालचालींना वेग येण्याची शक्यता आहे.
पुणे भाजपचा पहिला अधिकृत उमेदवारी अर्ज आज
दरम्यान, पुणे महानगरपालिका निवडणुकीसाठी भाजपकडून आज शहरातील पहिला अधिकृत उमेदवारी अर्ज दाखल केला जाणार आहे. प्रभाग क्रमांक २४ मधील उमेदवार तसेच निवडणूक प्रमुख गणेश बिडकर आज आपला अर्ज दाखल करणार आहेत. या प्रसंगी केंद्रीय राज्यमंत्री मुरलीधर मोहोळ, उच्च व तंत्रशिक्षण मंत्री चंद्रकांतदादा पाटील, आमदार सुनील कांबळे, आमदार हेमंत रासने आणि भाजप शहराध्यक्ष धीरजजी घाटे उपस्थित राहणार आहेत. भाजपकडून उमेदवारी अर्ज दाखल करण्यास सुरुवात झाल्याने पुण्यातील राजकीय वातावरण अधिक तापण्याची चिन्हे आहेत.
