times of maharashtra : अमेरिकेचे राष्ट्राध्यक्ष डोनाल्ड ट्रम्प यांनी इराण आणि पॅलेस्टिनी संघटना हमासला कडक इशारा दिला आहे. इराणने पुन्हा अणुबॉम्ब कार्यक्रम सुरू करण्याचा प्रयत्न केल्यास अमेरिका मोठा लष्करी हल्ला करू शकते, हमासने शस्त्रे खाली ठेवली नाहीत, तर गंभीर परिणामांना सामोरे जावे लागेल, असा इशाराही त्यांनी दिला. इस्त्रायली पंतप्रधान बेंजामिन नेतन्याहू यांच्यासोबत सोमवारी रात्री झालेल्या भेटीनंतर पत्रकारांशी बोलताना ट्रम्प यांनी हे विधान केले.
ट्रम्प म्हणाले की, जूनमध्ये झालेल्या मोठ्या अमेरिकन हल्ल्यानंतरही इराण पुन्हा आपला शस्त्र कार्यक्रम उभा करण्याचा प्रयत्न करत असल्याचे संकेत माध्यमांमधून मिळत आहेत. “इराण कुठे जात आहे आणि काय करत आहे, याची आम्हाला पूर्ण माहिती आहे,” असे त्यांनी सांगितले. यावेळी त्यांनी अमेरिकेच्या अत्याधुनिक B-2 स्टेल्थ बॉम्बरचा उल्लेख करत, अशा मोहिमांमध्ये होणाऱ्या प्रचंड इंधन खर्चाकडेही लक्ष वेधले.
नेतन्याहूंसोबतच्या चर्चेत गाझातील नाजूक युद्धविराम, हमासचे निःशस्त्रीकरण, इराणबाबत इस्रायलच्या सुरक्षा चिंता आणि लेबनॉनमधील हिजबुल्लाहशी संबंधित मुद्द्यांवर भर देण्यात आल्याचे ट्रम्प यांनी सांगितले. गाझामधील लढाई काहीशी कमी झाली असली तरी परिस्थिती अजूनही पूर्णपणे शांत झालेली नाही, असेही त्यांनी नमूद केले.
