Times of Maharashtra Desk: नववर्षाच्या स्वागतासाठी पुणे शहरात मोठ्या प्रमाणावर जल्लोष होत असतो. यानिमित्ताने लष्कर, डेक्कन जिमखाना, फर्ग्युसन रस्ता व जंगली महाराज रस्ता परिसरात होणारी संभाव्य गर्दी लक्षात घेऊन पुणे वाहतूक पोलिसांकडून आज बुधवार, ३१ डिसेंबर रोजी सायंकाळी ५ वाजल्यानंतर विशेष वाहतूक बदल लागू करण्यात आले आहेत.वाहतूक शाखेचे पोलीस उपायुक्त हिंमत जाधव यांनी दिलेल्या माहितीनुसार, मद्यप्राशन करून वाहन चालविणाऱ्या वाहनचालकांवर कडक कारवाई करण्यात येणार असून, रात्री १२ वाजेपर्यंत जड वाहनांना शहरात प्रवेशास मनाई करण्यात आली आहे.
फर्ग्युसन रस्ता व जंगली महाराज रस्त्यावरील वाहतूक बदल
1) कोथरूड व कर्वे रस्त्याकडून येणारी वाहतूक खंडुजीबाबा चौक येथे थांबविण्यात येणार असून, ती विधी महाविद्यालय रस्ता, प्रभात रस्ता व अलका चित्रपटगृह मार्गे वळविण्यात येणार आहे.
2) जंगली महाराज रस्त्यावर होणारी गर्दी लक्षात घेता झाशीची राणी लक्ष्मीबाई चौकातून पुढील वाहतूक बंद ठेवण्यात येणार आहे. संबंधित वाहतूक गोखले स्मारक चौक, उपरस्ते, पुणे महापालिका भवन, ओंकारेश्वर मंदिर व छत्रपती शिवाजी महाराज मार्गे वळविण्यात येईल.
3) वाय जंक्शनकडून महात्मा गांधी रस्त्याकडे जाणारी वाहतूक १५ ऑगस्ट चौक येथे बंद करून ती कुरेशी मशीद व सुजाता मस्तानी चौकाकडे वळविण्यात येणार आहे.
4) इस्कॉन मंदिराकडून लष्कर भागातील महात्मा गांधी रस्ता परिसरात सायंकाळी ५ नंतर वाहनांना प्रवेश बंद राहील.
5) फर्ग्युसन रस्त्यावरील गोखले स्मारक चौक ते फर्ग्युसन महाविद्यालयाच्या प्रवेशद्वारापर्यंत वाहनांना प्रवेश बंद ठेवण्यात येणार असून, ही बंदी पहाटे ५ वाजेपर्यंत लागू राहील.
6) बाबासाहेब आंबेडकर रस्ता तसेच अरोरा टॉवर्सकडे जाणारी वाहतूक बंद ठेवण्यात आली आहे. व्होल्गा चौकातून महंमद रफी चौकाकडे जाणारी वाहतूकही बंद राहील. या मार्गावरील वाहतूक ईस्ट स्ट्रीटमार्गे इंदिरा गांधी चौकाकडे वळविण्यात येईल.
7) इंदिरा गांधी चौकातून महावीर चौकाकडे जाणारी वाहतूक बंद राहील. ही वाहतूक लष्कर पोलीस ठाण्याकडे वळविण्यात येणार असून, सरबतवाला चौकातून महावीर चौकाकडे वाहतूक सुरू राहील.
महात्मा गांधी व जंगली महाराज रस्ता राहणार बंद
लष्कर भागातील महात्मा गांधी रस्त्यावरील १५ ऑगस्ट चौक ते अरोरा टॉवर्स चौकदरम्यान सायंकाळी ५ नंतर वाहनांना पूर्णतः प्रवेश बंद राहील. तसेच फर्ग्युसन रस्त्यावरील गोखले स्मारक चौक ते फर्ग्युसन महाविद्यालय प्रवेशद्वारापर्यंत पहाटे ५ वाजेपर्यंत वाहतूक बंद ठेवण्यात येणार आहे.
पुणेकरांनी वाहतूक पोलिसांना सहकार्य करावे, पर्यायी मार्गांचा वापर करावा आणि सुरक्षित पद्धतीने नववर्षाचे स्वागत करावे, असे आवाहन वाहतूक पोलिसांकडून करण्यात आले आहे.
