ब्रह्मपुरी (प्रतिनिधी रुपेश देशमुख) : मौजा हळदा भागात गोसेखुर्द कालव्याच्या मार्गाने कारमधून चाललेली देशी दारूची चोरटी वाहतूक ब्रह्मपुरी पोलिसांनी नाकाबंदी करून उघडकीस आणली आहे. या कारवाईत पोलिसांनी ५,००० बाटल्या देशी दारू आणि गुन्ह्यात वापरलेली फोर्ड फिगो कार, असा एकूण ५ लाख रुपयांचा मुद्देमाल जप्त केला असून दोन आरोपींविरुद्ध गुन्हा दाखल केला आहे.
पोलिसांनी दिलेल्या माहितीनुसार, १ जून रोजी रात्री १० वाजण्याच्या सुमारास हळदा बस स्टॉपकडून गोशाळेजवळील गोसेखुर्द कालव्याच्या पारीने एका निळ्या रंगाच्या कारमधून देशी दारूच्या पेट्या विक्रीसाठी नेल्या जात असल्याची गोपनीय माहिती मेंडकी पोलीस चौकीच्या अंमलदारांना मिळाली होती. या माहितीच्या आधारे पोलिसांनी तात्काळ घटनास्थळी सापळा रचून नाकाबंदी केली.
नाकाबंदी दरम्यान संशयास्पद वाटणारी निळ्या रंगाची फोर्ड फिगो कार (क्रमांक MH 31 DK 0647) पोलिसांनी थांबवली. वाहनाची झडती घेतली असता, कारमध्ये प्रत्येकी ९० एमएल मापाच्या एकूण ५० खाकी खोक्यांमध्ये लपवून ठेवलेल्या ५,००० रॉकेट संत्रा देशी दारूच्या बाटल्या आढळून आल्या. जप्त केलेल्या या दारूची किंमत सुमारे २ लाख रुपये आहे, तर ३ लाख रुपयांची कार असा एकूण ५ लाख रुपयांचा मुद्देमाल पोलिसांनी हस्तगत केला.
या प्रकरणी कार चालक अरुण उर्फ मारोती रामचंद्र लाडवे (वय ३६) आणि दारूचा मूळ मालक हरबच्चन सिंग गुरुदीप सिंग टाक (वय ४०, दोघेही राहणार हळदा, ता. ब्रह्मपुरी) यांना ताब्यात घेण्यात आले आहे. आरोपींविरुद्ध ब्रह्मपुरी पोलीस ठाण्यात अपराध क्रमांक ५०४/२०२६ नुसार महाराष्ट्र दारूबंदी अधिनियम कलम ६५(अ) आणि ८३ अंतर्गत गुन्हा दाखल करण्यात आला आहे.
सदर यशस्वी कारवाई चंद्रपूरचे पोलीस अधीक्षक आयुष नोपानी, अप्पर पोलीस अधीक्षक ईश्वर कातकडे, प्रभारी उपविभागीय अधिकारी दिनकर ठोसरे आणि ब्रह्मपुरीचे पोलीस निरीक्षक प्रमोद बानबले यांच्या मार्गदर्शनात करण्यात आली. सहाय्यक पोलीस निरीक्षक मनोज खडसे यांच्या नेतृत्वाखाली पोलीस हवालदार रतन लेनगुरे, मिलिंद नैताम, मुकेश गजबे, अमोल लोनबले, अनिल आगासे, निलेश तुमसरे, स्वप्निल पळसपगार आणि इरशाद खान यांनी ही धडक कारवाई केली. या प्रकरणाचा पुढील तपास पोलीस हवालदार मिलिंद नैताम करीत आहेत.
