Times of Maharashtra Desk : मुंबई मुलुंड(पश्चिम)परिसरातील लाल बहादूर शास्त्री मार्गावर शनिवारी दुपारी मेट्रो बांधकामादरम्यान भीषण अपघात घडला. बांधकाम सुरू असलेल्या मेट्रो पिलरचा सिमेंटचा स्लॅब अचानक तुटून खाली कोसळल्याने रस्त्यावरून जात असलेल्या ऑटो रिक्षा आणि कारचा चेंदामेंदा झाला. या दुर्घटनेत एका व्यक्तीचा उपचारादरम्यान मृत्यू झाला असून चार जण जखमी झाले आहेत.
घटना सविस्तर
घटना दुपारी सुमारे १२.२० वाजण्याच्या सुमारास जॉन्सन अँड जॉन्सन कंपनीजवळ घडली. प्राथमिक माहितीनुसार, मेट्रो मार्गिकेवरील गर्डर व स्लॅब वरती चढवण्याचे काम सुरू असताना सिमेंटचा एक मोठा तुकडा खाली पडला आणि तो थेट ऑटो रिक्षावर कोसळला. त्याच वेळी शेजारील कारलाही त्याचा फटका बसला. स्लॅबच्या तडाख्याने दोन्ही वाहनांचे मोठे नुकसान झाले.
अपघाताच्या वेळी रिक्षामध्ये चालकासह तीन प्रवासी होते. सर्व जखमींना तातडीने जवळच्या रुग्णालयात हलविण्यात आले. त्यापैकी एका जखमीचा उपचारादरम्यान मृत्यू झाला. इतर जखमींवर उपचार सुरू असून त्यांची प्रकृती स्थिर असल्याची प्राथमिक माहिती आहे. घटनेची माहिती मिळताच मुंबई अग्निशमन दल, स्थानिक पोलीस, मेट्रो प्राधिकरणाचे अधिकारी तसेच १०८ रुग्णवाहिका सेवा घटनास्थळी दाखल झाली. पोलिसांनी तातडीने परिसर ताब्यात घेत वाहतूक वळवली. रस्त्यावर पडलेला मलबा हटवण्याचे काम हाती घेण्यात आले असून वाहतूक काही काळ विस्कळीत झाली होती.
अपघाताची चौकशी सुरु
दरम्यान, बांधकामादरम्यान सुरक्षेचे नियम पाळले गेले होते का, तसेच घटनास्थळी आवश्यक बॅरिकेट्स व खबरदारीची उपाययोजना होती का, याबाबत चौकशी सुरू करण्यात आली आहे. मेट्रो प्रशासन आणि संबंधित कंत्राटदारांकडून स्पष्टीकरण मागविण्यात आले असून अपघाताचे नेमके कारण शोधण्यासाठी तपास सुरू आहे.या घटनेमुळे परिसरात हळहळ व्यक्त केली जात असून, मेट्रो बांधकामाच्या सुरक्षाव्यवस्थेबाबत प्रश्नचिन्ह निर्माण झाले आहे.
