गेवराई, (प्रतिनिधी विष्णू गायकवाड) : बीड जिल्ह्यातील गेवराई तालुक्यात एक अत्यंत दुर्दैवी घटना घडली असून, विहिरीत तोल जाऊन पडल्याने २५ वर्षीय तरुणाचा मृत्यू झाला आहे. ही घटना तालुक्यातील सुशी वडगाव येथे शनिवारी (दुपारी सुमारे ३ वाजता) घडली.
मिळालेल्या माहितीनुसार, संकेत कैलास काळे (वय २५) हा तरुण शेती व्यवसाय करत होता. त्याच्या मालकीच्या शेतामध्ये सध्या विहीर खोदण्याचे काम सुरू होते. शनिवारी दुपारी तो विहिरीचे काम कितपत झाले आहे, याची पाहणी करण्यासाठी शेतात गेला होता.
यावेळी विहिरीच्या कडेला उभा असताना त्याचा अचानक तोल गेला आणि तो थेट विहिरीत कोसळला. या अपघातात तो गंभीर जखमी झाला. विहिरीचे खोदकाम करणाऱ्या कामगारांनी तत्काळ ही माहिती त्याच्या कुटुंबियांना दिली.
घटनेची माहिती मिळताच नातेवाईकांनी घटनास्थळी धाव घेतली आणि जखमी अवस्थेतील संकेत काळे याला तातडीने उपचारासाठी बीड येथील रुग्णालयाकडे हलविण्यात आले. मात्र, रुग्णालयात पोहोचण्यापूर्वीच वाटेत त्याचा मृत्यू झाला.
या घटनेमुळे परिसरात हळहळ व्यक्त होत आहे. अत्यंत मेहनती व कष्टाळू स्वभावाचा म्हणून ओळख असलेल्या संकेत काळेच्या अचानक निधनाने गावावर शोककळा पसरली आहे. त्याच्या पश्चात आई, वडील व एक बहीण असा परिवार आहे.
दरम्यान, अशा प्रकारच्या घटना टाळण्यासाठी विहिरीच्या कामाच्या ठिकाणी आवश्यक सुरक्षात्मक उपाययोजना करणे गरजेचे असल्याचे मत ग्रामस्थांकडून व्यक्त केले जात आहे.
