गेवराई (प्रतिनिधी विष्णू गायकवाड) : बीड जिल्ह्यातील पाटोदा तालुक्यातील डोंगरकिनी येथील इमाम शेख इसाक अहमद यांना झालेल्या गंभीर अपघातानंतर त्यांच्या उपचारासाठी हिमायत फाउंडेशन, गेवराई यांच्या वतीने ₹५०,००० ची आर्थिक मदत देण्यात आली आहे. या मदतीमुळे त्यांच्या कुटुंबाला मोठा दिलासा मिळाला आहे.
मिळालेल्या माहितीनुसार, शेख इसाक अहमद हे अत्यंत गरीब परिस्थितीत जीवन जगत असून ते गावातील मशिदीत इमाम म्हणून सेवा देत आहेत. ते आपल्या नियमित आरोग्य तपासणीसाठी रुग्णालयात जात असताना कमी दृष्टीमुळे त्यांचा अपघात झाला. अपघातानंतर त्यांना तातडीने रुग्णालयात दाखल करण्यात आले.
डॉक्टरांनी त्यांच्यावर शस्त्रक्रिया केली, मात्र त्यांना असलेल्या मधुमेहामुळे (साखरेच्या आजारामुळे) शरीरातील साखरेची पातळी सतत बदलत असल्याने शस्त्रक्रिया अपेक्षित यश देऊ शकली नाही. त्यामुळे त्यांची प्रकृती चिंताजनक बनली आहे.
शेख इसाक अहमद हे त्यांच्या कुटुंबातील एकमेव कमावते सदस्य असून त्यांच्या उत्पन्नावरच कुटुंबाचा उदरनिर्वाह चालतो. अपघातानंतर त्यांचे काम थांबल्याने आणि उपचाराचा खर्च वाढल्याने कुटुंबावर मोठे आर्थिक संकट कोसळले होते.
ही परिस्थिती लक्षात घेऊन हिमायत फाउंडेशन, गेवराई यांनी सामाजिक बांधिलकी जपत त्यांच्या कुटुंबाला ₹५०,००० ची आर्थिक मदत धनादेशाद्वारे दिली. या मदतीमुळे त्यांच्या उपचारासाठी तसेच दैनंदिन गरजा भागवण्यासाठी मोठा आधार मिळाला आहे.
हिमायत फाउंडेशनने यापूर्वीही अनेक गरजू, गरीब आणि संकटग्रस्त कुटुंबांना मदतीचा हात दिला असून भविष्यातही अशीच सामाजिक सेवा सुरू ठेवण्याचा निर्धार व्यक्त करण्यात आला.
यावेळी फाउंडेशनचे अध्यक्ष मुफ्ती उमर कुरेशी, मौलाना ताहेर मक्की, मौलाना अब्दुल हकीम (पाटोदा), बदर इंटरनॅशनल इंग्लिश स्कूलचे संचालक सय्यद एजाज सर, फाउंडेशनचे सचिव शेख मुजीब, लुकमान खान, अब्दुल खवी तसेच गावातील जेष्ठ व तरुण समाज बांधव मोठ्या संख्येने उपस्थित होते.
या मदतीमुळे शेख इसाक अहमद यांच्या कुटुंबाला दिलासा मिळाला असून परिसरात हिमायत फाउंडेशनच्या कार्याचे कौतुक होत आहे.
