मारेगाव (प्रतिनिधी देवा आत्राम) : पांढरकवडा परिसरात ‘निर्माण प्रकल्पा’च्या माध्यमातून सर्वांगीण विकासाचे नवे पर्व सुरू झाले आहे. ITDP Pandharkawda, United Way Mumbai आणि John Deere India यांच्या संयुक्त विद्यमाने झरी जामणी या आकांक्षित तालुक्यात विविध उपक्रम राबवले जात आहेत.
या प्रकल्पांतर्गत शिबला व माथार्जुन येथील आश्रमशाळांमध्ये अत्याधुनिक शैक्षणिक सुविधा उपलब्ध करून देण्यात आल्या आहेत. माथार्जुन आश्रमशाळेत STEM लॅब, कॉम्प्युटर लॅब, स्मार्ट टीव्ही, ग्रीन बोर्ड, वर्गखोल्यांचे रंगकाम, हँडवॉश स्टेशन तसेच समृद्ध ग्रंथालय उभारण्यात आले आहे. तर शिबला आश्रमशाळेतही ग्रीन बोर्ड, स्मार्ट टीव्ही, STEM लॅब, कॉम्प्युटर लॅब आणि ग्रंथालय संचाची सुविधा विद्यार्थ्यांना मिळाली आहे.
या उपक्रमामुळे आदिवासी व ग्रामीण भागातील विद्यार्थ्यांना आधुनिक तंत्रज्ञानावर आधारित शिक्षण मिळत असून त्यांच्या गुणवत्तापूर्ण शिक्षणाला चालना मिळत आहे. डिजिटल साधनांमुळे विद्यार्थ्यांची शिकण्याची आवड वाढत असून शिक्षकांनाही अध्यापन अधिक प्रभावीपणे करता येत आहे.
याशिवाय, या प्रकल्पात शिक्षणाबरोबरच शेती आणि जलसंधारणावरही विशेष भर देण्यात येत आहे. स्थानिक शेतकऱ्यांना आधुनिक तंत्रज्ञानाची माहिती देऊन उत्पादनवाढीस प्रोत्साहन दिले जात आहे, तसेच जलसंधारणाच्या उपाययोजनांमुळे पाण्याची उपलब्धता सुधारण्याचा प्रयत्न केला जात आहे.
एकूणच, ‘निर्माण प्रकल्प’ हा झरी-जामणी तालुक्यातील विकासासाठी महत्त्वाचा टप्पा ठरत असून, शिक्षण, शेती आणि पाणी व्यवस्थापनाच्या माध्यमातून या भागाच्या उज्ज्वल भविष्यासाठी मजबूत पायाभरणी केली जात आहे.
