जळगाव (प्रतिनिधी विनोद पवार) : जळगाव शहरातील शनी पेठ पोलीस ठाण्यात कार्यरत असलेल्या एका पोलीस कर्मचाऱ्याला लाचलुचपत प्रतिबंधक विभागाने मोठी कारवाई करत एक लाख रुपयांची लाच स्वीकारताना रंगेहात अटक केली. या कारवाईमुळे पोलीस विभागात एकच खळबळ उडाली आहे.
लाचलुचपत प्रतिबंधक विभागाकडून मिळालेल्या माहितीनुसार, विनोद पितांबर अहिरे (वय ४०, रा. पोलीस लाईन, जळगाव) असे अटक करण्यात आलेल्या संशयिताचे नाव असून ते सध्या जळगाव शहरातील शनी पेठ पोलीस ठाण्यात कार्यरत होते.
तक्रारदार हा जळगाव येथील रहिवासी असून, त्याच्या मुलाविरोधात शनी पेठ पोलीस ठाण्यात एक तक्रार अर्ज दाखल करण्यात आला होता. सदर अर्जावर कोणतीही कायदेशीर कारवाई न करता तो निकाली काढण्यासाठी संबंधित पोलिस कर्मचाऱ्याने तक्रारदाराकडे सुरुवातीला दोन लाख रुपयांची लाच मागितली होती.
मात्र, नंतर दोघांमध्ये तडजोड होऊन ही रक्कम एक लाख रुपयांवर निश्चित करण्यात आली. तक्रारदाराने लाच देण्याची इच्छा नसल्याने त्यांनी थेट लाचलुचपत प्रतिबंधक विभागाकडे तक्रार दाखल केली. तक्रारीची पडताळणी केल्यानंतर अधिकाऱ्यांनी सापळा रचण्याचा निर्णय घेतला.
सोमवारी रचलेल्या सापळ्यात संशयित विनोद अहिरे यांनी तक्रारदाराकडून एक लाख रुपयांची लाच स्वीकारली. त्याच वेळी दबा धरून बसलेल्या लाचलुचपत प्रतिबंधक पथकाने तात्काळ कारवाई करत त्यांना रंगेहात पकडले.
या प्रकरणी संशयिताविरुद्ध भ्रष्टाचार प्रतिबंधक अधिनियम १९८८ (सुधारित २०१८) अंतर्गत कलम ७ अन्वये गुन्हा नोंदविण्याची प्रक्रिया उशिरापर्यंत सुरू होती.
या धडक कारवाईमुळे पोलीस विभागात मोठी खळबळ उडाली असून, भ्रष्टाचाराविरोधात प्रशासनाने पुन्हा एकदा कडक भूमिका घेतल्याचे स्पष्ट झाले आहे.
