निफाड (प्रतिनिधी उत्तम जाधव) : निफाड तालुक्यातील पिंपळस परिसरात २३ तारखेला दुपारी सुमारे अडीच वाजण्याच्या सुमारास कार आणि दुचाकी यांच्यात समोरासमोर धडक होऊन भीषण अपघात झाला. या दुर्घटनेत निफाड येथील शासकीय औद्योगिक प्रशिक्षण संस्थेतील (आयटीआय) १७ वर्षीय विद्यार्थी पियुष प्रताप गायकवाड याचा दुर्दैवी मृत्यू झाला असून त्याचा मित्र गंभीर जखमी झाला आहे.
मिळालेल्या माहितीनुसार, पियुष गायकवाड आणि त्याचा मित्र हे दोघे चांदोरी येथून निफाडकडे मोटरसायकल (क्रमांक एमएच १५ केएफ १७८९) वरून येत होते. पिंपळसजवळ समोरून येणाऱ्या नेक्सन कार (क्रमांक एमएच १५ एसी ८५०९) आणि त्यांच्या दुचाकीची जोरदार धडक झाली. या अपघातात दोघेही विद्यार्थी गंभीर जखमी झाले.
घटनास्थळी उपस्थित नागरिकांनी तत्काळ त्यांना उपचारासाठी रुग्णालयात हलवले. मात्र उपचारासाठी नेत असताना पियुष गायकवाड याचा मृत्यू झाला. त्याचा मित्र सध्या खासगी रुग्णालयात उपचार घेत असून त्याची प्रकृती चिंताजनक असल्याची माहिती आहे.
मृत पियुष हा निफाड येथील शासकीय औद्योगिक प्रशिक्षण संस्थेत शिक्षण घेत होता. त्याच्या पश्चात आई-वडील आणि एक भाऊ असा परिवार आहे. या दुर्दैवी घटनेमुळे आयटीआय परिसरात तसेच पिंपळस व निफाड भागात हळहळ व्यक्त केली जात आहे.
