जळगाव (प्रतिनिधी विनोद पवार) : नोकरीसंदर्भातील काम करून देण्यासाठी ३ हजार रुपयांची लाच मागणाऱ्या आरोग्य विभागातील सहाय्यक अधीक्षकाला लाचलुचपत प्रतिबंधक विभागाने (ACB) रंगेहाथ पकडल्याची धक्कादायक घटना पारोळा येथे उघडकीस आली आहे. ही कारवाई मंगळवार, २८ एप्रिल २०२६ रोजी करण्यात आली.
या प्रकरणातील आरोपी विजय प्रकाश वाघ (वय ४२, रा. पारोळा) असून तो आरोग्य विभागात सहाय्यक अधीक्षक म्हणून कार्यरत आहे. तक्रारदाराच्या नोकरीच्या कामासाठी मदत करण्याच्या बदल्यात त्याने ३ हजार रुपयांची मागणी केली होती.
तक्रारदाराने याबाबत जळगाव ACB कार्यालयात तक्रार दाखल केल्यानंतर पथकाने सापळा रचला. ठरल्याप्रमाणे आरोपीने २ हजार रुपये स्वीकारताच ACB च्या पथकाने त्याला रंगेहाथ अटक केली. या कारवाईदरम्यान रोख रक्कम व मोबाईल फोन जप्त करण्यात आला.
या प्रकरणी पारोळा पोलीस ठाण्यात भ्रष्टाचार प्रतिबंधक कायद्यानुसार गुन्हा दाखल करण्याची प्रक्रिया सुरू असून पुढील तपास सुरू आहे.
ही कारवाई पोलीस उपअधीक्षक योगेश ठाकूर यांच्या मार्गदर्शनाखाली निरीक्षक हेमंत नागरे व त्यांच्या पथकाने यशस्वीरीत्या पार पाडली.
जिल्ह्यात ACB च्या या कारवाईमुळे भ्रष्ट अधिकाऱ्यांमध्ये खळबळ उडाली असून, नागरिकांना लाच मागणाऱ्यांविरोधात निर्भीडपणे तक्रार करण्याचे आवाहन करण्यात आले आहे.
