जळगाव (प्रतिनिधी विनोद पवार) : देशभरात एलपीजी गॅस सिलेंडरच्या वाढत्या दरांमुळे सर्वसामान्य नागरिकांचे आर्थिक गणित कोलमडत असतानाच, आता किंमत रचनेतील विसंगतीमुळे ग्राहकांमध्ये तीव्र नाराजी पसरली आहे. 5 किलोच्या छोट्या सिलेंडरची किंमत 14.2 किलोच्या घरगुती सिलेंडरच्या तुलनेत disproportionately जास्त असल्याचे स्पष्ट होत आहे.
सध्या 5 किलो एलपीजी सिलेंडर सुमारे ₹813 ला मिळत असून 14.2 किलो घरगुती सिलेंडरची किंमत ₹913 इतकी आहे. म्हणजेच जवळपास तीनपट जास्त गॅस असलेला सिलेंडर फक्त ₹100 ने महाग आहे. या तुलनेत प्रति किलो दर मोजला असता छोटा सिलेंडर अधिक महाग पडतो, ज्यामुळे ग्राहकांमध्ये संभ्रम निर्माण झाला आहे.
गेल्या दोन महिन्यांत गॅस दरात चार वेळा वाढ झाल्याने महागाईचा ताण अधिक वाढला आहे. आंतरराष्ट्रीय स्तरावर कच्च्या इंधनाच्या किंमतीत वाढ, तसेच मध्यपूर्वेतील तणावपूर्ण परिस्थिती याचा परिणाम एलपीजी दरांवर होत असल्याचे तज्ज्ञ सांगतात. याशिवाय, निवडणुकीपूर्वी दर नियंत्रणात ठेवून नंतर वाढ करण्यात आल्याचा आरोपही नागरिकांकडून होत आहे.
तेल कंपन्यांच्या मते, छोट्या सिलेंडरवर वाहतूक, वितरण आणि ऑपरेशनल खर्च अधिक असल्याने त्याचे दर तुलनेने जास्त असतात. मात्र ग्राहकांच्या दृष्टीने हा फरक अन्यायकारक वाटत आहे. विशेषतः ग्रामीण व अल्प उत्पन्न गटातील कुटुंबे 5 किलो सिलेंडरचा वापर अधिक करतात, त्यामुळे त्यांच्यावर आर्थिक ताण वाढत आहे.
दरम्यान, व्यावसायिक 19 किलो सिलेंडरच्या दरातही वाढ झाली असून त्याचा अप्रत्यक्ष परिणाम बाजारभावांवर होत आहे. वाढत्या महागाईच्या पार्श्वभूमीवर सरकारने तातडीने हस्तक्षेप करून गॅस दरांमध्ये दिलासा द्यावा, अशी मागणी नागरिकांकडून होत आहे.
