दौंड (प्रतिनिधी-मयूर साळवे,संघराज गायकवाड)
वंचित बहुजन आघाडीचे राष्ट्रीय अध्यक्ष अॅड. बाळासाहेब आंबेडकर यांच्या विचारांनी प्रेरित होऊन दौंड शहर व तालुक्यातील ग्रामीण भागातील शेकडो युवकांनी वंचित बहुजन आघाडीत जाहीर प्रवेश केला. हा पक्षप्रवेश सोहळा सहकार चौक येथील हॉटेल सिटी इन येथे उत्साहात पार पडला.
या कार्यक्रमाला वंचित बहुजन आघाडीचे पुणे जिल्हाध्यक्ष राजकुमार साहेब यांची प्रमुख उपस्थिती होती. दौंड तालुका अध्यक्ष अक्षय शिखरे व तालुका कार्यकारिणीच्या वतीने कार्यक्रमाचे आयोजन करण्यात आले होते. उपस्थित युवकांनी पक्षाचे झेंडे हाती घेत वंचित बहुजन आघाडीच्या विचारांशी बांधिलकी व्यक्त केली.
यावेळी बोलताना जिल्हाध्यक्ष राजकुमार साहेब म्हणाले, आजच्या राजकीय परिस्थितीत युवकांना योग्य दिशा देण्याचे काम वंचित बहुजन आघाडी करत आहे. बाळासाहेब आंबेडकर यांच्या नेतृत्वाखाली बहुजनांच्या हक्कासाठी लढणारा हा पक्ष असून दौंड तालुक्यातील युवकांचा वाढता प्रतिसाद परिवर्तनाची नांदी आहे.
पक्षात प्रवेश केलेल्या युवकांनी बेरोजगारी, शिक्षण, शेतकरी व आरोग्याच्या प्रश्नांवर संघर्ष करण्यासाठी वंचित बहुजन आघाडीचा पर्याय निवडल्याचे सांगितले. संविधानवादी विचार पुढे नेण्यासाठी कटिबद्ध असल्याची भावना त्यांनी व्यक्त केली.
कार्यक्रमास तालुकाध्यक्ष अक्षय शिखरे, पुणे जिल्हा उपाध्यक्ष रणजीत पाडळे, जिल्हा महासचिव सतीश साळवे, तालुका उपाध्यक्ष शुभम वानखेडे, सचिव राजेश ओहोळ, कार्याध्यक्ष सुरज माने, यश खोमणे, संघटक विशाल कांबळे, विशाल चंद्रमोरे, गौरव ढवळे, गौरव शिंदे, दीपक पवार, बाळासाहेब गायकवाड, अॅड. किरण लोंढे यांच्यासह शेकडो कार्यकर्ते व पदाधिकारी उपस्थित होते.
कार्यक्रमाचे सूत्रसंचालन उमेश नडगमकर यांनी केले तर आभार प्रदर्शन अक्षय शिखरे यांनी मानले.
