निफाड (प्रतिनिधी उत्तम जाधव) : शेतीच्या सामायिक बांधावरील लोखंडी अँगल वाकवल्याच्या कारणावरून झालेल्या वादातून एका 30 वर्षीय महिलेला मारहाण करून जीवे मारण्याची धमकी दिल्याची घटना धानोरे शिवारात घडली आहे. याप्रकरणी लासलगाव पोलिस ठाण्यात चौघांविरोधात गुन्हा दाखल करण्यात आला आहे.
घटनेचा तपशील
पोलिसांनी दिलेल्या माहितीनुसार, 19 मे 2026 रोजी दुपारी साडेचारच्या सुमारास सोनाली दत्तात्रय तासकर (वय 30, रा. धानोरे शिवार) या आपल्या शेतात गवत काढत होत्या. त्यावेळी आरोपी बाबासाहेब माधव तासकर, ओमकार बाबासाहेब तासकर आणि आदित्य बाबासाहेब तासकर हे ट्रॅक्टरच्या साहाय्याने शेताची मशागत करत होते.
सामायिक बांधावरील लोखंडी अँगल का वाकवला, असा जाब विचारत सोनाली तासकर यांनी मोबाईलवर व्हिडिओ चित्रिकरण सुरू केले. याचा राग आल्याने आरोपींनी शिवीगाळ करत त्यांच्यावर हल्ला केला.
तक्रारीनुसार, बाबासाहेब तासकर यांनी सोनाली यांच्या केसांना धरून त्यांना खाली पाडले व लाकडी काठीने डोक्यावर तसेच उजव्या हाताच्या मनगटावर मारहाण केली.
पतीला देखील धमकी
आरडाओरड ऐकून सोनाली यांचे पती दत्तात्रय तासकर मदतीसाठी धावून आले. मात्र आरोपींनी त्यांनाही शिवीगाळ करत “पुन्हा आमच्या नादी लागलात तर जिवंत सोडणार नाही,” अशी धमकी दिल्याचे फिर्यादीत नमूद करण्यात आले आहे. तसेच महिलांची साडी फाडून नुकसान केल्याचाही आरोप करण्यात आला आहे.
पोलिसांत गुन्हा दाखल
सोनाली तासकर यांच्या फिर्यादीवरून लासलगाव पोलिस ठाण्यात बाबासाहेब माधव तासकर, ओमकार बाबासाहेब तासकर, आदित्य बाबासाहेब तासकर यांच्यासह एका अन्य व्यक्तीविरोधात मारहाण, शिवीगाळ, विनयभंग व जीवे मारण्याची धमकी दिल्याप्रकरणी गुन्हा दाखल करण्यात आला आहे. पुढील तपास पोलीस उपनिरीक्षक करत आहेत.
