सिन्नर (नवनाथ आव्हाड) :शहरातील गल्ली-बोळ आणि अरुंद रस्त्यांमुळे आग लागल्यास तातडीने मदत पोहोचविण्यात येणाऱ्या अडचणी लक्षात घेऊन सिन्नर नगरपरिषदेच्या अग्निशमन दलात गुरखा वाहनाचा समावेश करण्यात आला आहे.
या वाहनामुळे अरुंद रस्ते, दाट वस्ती आणि गर्दीच्या भागात अग्निशमन दलाला वेगाने पोहोचणे शक्य होणार असून आगीच्या घटनांवर त्वरित नियंत्रण मिळविण्यास मदत होणार आहे.
आमदार माणिकराव कोकाटे यांच्या माध्यमातून हे वाहन उपलब्ध झाले आहे. आपत्कालीन परिस्थितीचा प्रभावीपणे सामना करण्यासाठी तसेच अग्निशमन दलाची कार्यक्षमता वाढविण्यासाठी हा उपक्रम राबविण्यात आला आहे. शॉर्टसर्किट, अपघात, आग व इतर आपत्कालीन घटनांमध्ये तत्काळ प्रतिसाद देण्यासाठी हे वाहन उपयुक्त ठरणार आहे.
नवीन गुरखा वाहन शक्तिशाली इंजिन आणि मजबूत रचनेसाठी ओळखले जाते. वाहन समावेश कार्यक्रमास नगराध्यक्ष विठ्ठल उगले, उपनगराध्यक्ष हर्षद देशमुख, मुख्याधिकारी अभिजित कदम, मनोज देशमुख, उदय गोळेसर, पंकज मोरे यांच्यासह नगरसेवक आणि पदाधिकारी उपस्थित होते.
