सिरोंचा (प्रतिनिधी जाबिर खान) : सिरोंचा तालुक्याचे तहसीलदार अजय सकुंदरवार हे आपल्या लोकाभिमुख कार्यपद्धतीमुळे, तत्पर प्रशासनामुळे आणि जनतेप्रती असलेल्या संवेदनशील दृष्टिकोनामुळे नागरिकांमध्ये विशेष लोकप्रिय ठरत आहेत. गोरगरीब, वंचित आणि गरजू नागरिकांच्या समस्या समजून घेऊन त्यांचे त्वरित निराकरण करण्यासाठी ते सातत्याने प्रयत्नशील असल्याने अनेक नागरिक त्यांना प्रेमाने ‘देवदूत’ म्हणून संबोधत आहेत.
तहसील कार्यालयात येणाऱ्या नागरिकांच्या तक्रारी व महसूलविषयक कामांचा जलद निपटारा करण्याबरोबरच सकुंदरवार हे गावागावांत जाऊन प्रत्यक्ष नागरिकांशी संवाद साधतात. दुर्गम व आदिवासी भागातील नागरिकांच्या अडचणी जाणून घेऊन त्यांना विविध शासकीय योजनांचा लाभ मिळवून देण्यासाठी ते विशेष पुढाकार घेत असल्याचे दिसून येते.
जातीचे दाखले, उत्पन्न प्रमाणपत्र, रहिवासी दाखले, संजय गांधी योजना, नैसर्गिक आपत्ती मदत तसेच इतर प्रशासकीय कामे वेळेत पूर्ण व्हावीत यासाठी ते स्वतः लक्ष घालत असल्याने नागरिकांमध्ये समाधानाचे वातावरण आहे. त्यांच्या कार्यपद्धतीमुळे प्रशासनाविषयी लोकांचा विश्वास अधिक दृढ होत असल्याचे चित्र दिसून येत आहे.
विशेष म्हणजे, दुपारच्या भोजनाच्या वेळेतही आपल्या शासकीय निवासस्थानी जाताना सरकारी वाहनात बसूनच नागरिकांचे फोन स्वीकारणे, त्यांच्या अडचणी ऐकून घेणे आणि संबंधित अधिकाऱ्यांना तत्काळ सूचना देणे असे चित्र अनेकदा पाहायला मिळते. कामाप्रती असलेली त्यांची ही निष्ठा आणि जनसेवेची तळमळ नागरिकांच्या कौतुकाचा विषय ठरत आहे.
सिरोंचा तालुक्यातील सर्वसामान्य नागरिकांच्या सेवेसाठी सदैव तत्पर राहणारे तहसीलदार अजय सकुंदरवार हे खऱ्या अर्थाने जनतेचे अधिकारी असून त्यांच्या कार्यामुळे प्रशासन अधिक लोकाभिमुख आणि जनतेच्या जवळ पोहोचत असल्याची भावना नागरिक व्यक्त करत आहेत.
