तिरुमला : अनंत अंबानी यांनी तिरुमला वेंकटेश्वर मंदिर येथे दर्शन घेतल्यानंतर तिरुमला तिरुपती देवस्थानम (TTD) ला तब्बल २५ इलेक्ट्रिक बसांचे दान जाहीर केले. सुमारे २७.५ कोटी रुपयांच्या या उपक्रमामुळे देवस्थानाच्या हरित वाहतूक व्यवस्थेला मोठी चालना मिळणार आहे.
प्रत्येकी सुमारे १.१ कोटी रुपये किमतीच्या या बसांसह रिलायन्सकडून बसचालकांच्या वेतनाचा खर्च, इलेक्ट्रिक वाहनांसाठी अत्याधुनिक चार्जिंग स्टेशन उभारणी आणि आवश्यक पायाभूत सुविधा उपलब्ध करून देण्यात येणार आहेत. या बसांसाठी ५० चालकांच्या वेतनाची जबाबदारीही कंपनीने स्वीकारली आहे. त्यामुळे टीटीडीच्या इलेक्ट्रिक वाहन प्रकल्पातील मनुष्यबळ आणि चार्जिंग सुविधेची मोठी अडचण दूर होणार आहे.
दर्शनासाठी आलेल्या अनंत अंबानी यांनी पारंपरिक पांढरा धोतर व शाल परिधान करून पहाटेच्या सुप्रभात सेवा आणि श्री वेंकटेश्वर स्वामींचे दर्शन घेतले. त्यानंतर मंदिरातील शतकानुशतके सुरू असलेल्या परंपरेनुसार त्यांनी मुंडन (केशदान) केले. दरवर्षी लाखो भाविक श्रद्धेने ही परंपरा पाळतात.
यावेळी त्यांनी टीटीडीच्या गोशाळेच्या आधुनिकीकरणासाठीही मदतीची घोषणा केली. गुजरातमधील रिलायन्सच्या ‘वंतारा’ प्रकल्पाच्या धर्तीवर गोसंवर्धन आणि प्राणीसेवा अधिक सक्षम करण्यासाठी सहकार्य करण्यात येणार असल्याचे सांगितले.
अनंत अंबानी हे विविध हिंदू तीर्थक्षेत्रांना नियमित भेट देत असून, भगवान श्रीकृष्ण आणि श्रीनाथजी यांच्यावरील आपल्या श्रद्धेबाबत त्यांनी अनेकदा सार्वजनिकरित्या भावना व्यक्त केल्या आहेत. विवाहापूर्वी त्यांनी द्वारकाधीश मंदिरापर्यंत पदयात्राही केली होती.
तिरुमला भेटीदरम्यान केलेले केशदान आणि पर्यावरणपूरक वाहतूक व्यवस्थेसाठी दिलेले मोठे योगदान यामुळे अनंत अंबानी यांच्या या भेटीची देशभरात विशेष चर्चा होत आहे. श्रद्धा, सामाजिक बांधिलकी आणि पर्यावरण संवर्धन यांचा संगम घडवणारा हा उपक्रम म्हणून त्याकडे पाहिले जात आहे.
