निफाड (प्रतिनिधी योगेश कर्डिले): पिंपळगाव बसवंत पोलीस ठाण्याचा कार्यभार स्वीकारल्यानंतर अवघ्या काही तासांतच पोलीस निरीक्षक गणेश गुरव यांनी आपल्या तत्पर व परिणामकारक कामगिरीची छाप उमटवली आहे. अपहरण झालेल्या १५ वर्षीय मुलाचा अवघ्या २४ तासांच्या आत शोध घेऊन त्याला सुखरूपपणे आई-वडिलांच्या ताब्यात देण्यात पोलिसांना यश आले.
याबाबत मिळालेल्या माहितीनुसार, दि. ३ जुलै २०२६ रोजी रात्री सुमारे ९.०० वाजण्याच्या सुमारास एका १५ वर्षीय मुलाचे अज्ञात व्यक्तीने अपहरण केल्याची तक्रार त्याच्या आई-वडिलांनी पिंपळगाव बसवंत पोलीस ठाण्यात दिली. घटनेचे गांभीर्य लक्षात घेत पोलीस निरीक्षक गणेश गुरव यांनी तात्काळ पोलीस शिपाई गाढवे, पोलीस शिपाई उगले व पोलीस शिपाई वाळुंज यांचे विशेष तपास पथक तयार केले.
तपास पथकाला आवश्यक सूचना व मार्गदर्शन करून त्वरित शोधमोहीम सुरू करण्यात आली. विविध तांत्रिक बाबींचा तसेच गोपनीय माहितीचा आधार घेत पोलिसांनी अवघ्या २४ तासांच्या आत अपहरित मुलाचा शोध घेत त्याला सुखरूप ताब्यात घेतले. त्यानंतर मुलाला त्याच्या आई-वडिलांच्या स्वाधीन करण्यात आले.
या तत्पर आणि यशस्वी कारवाईमुळे पोलीस निरीक्षक गणेश गुरव यांच्या कार्यक्षम नेतृत्वाचे तसेच तपास पथकाच्या समन्वयपूर्ण कामगिरीचे सर्वत्र कौतुक होत आहे. सामाजिक बांधिलकी जपत नागरिकांच्या सुरक्षिततेला सर्वोच्च प्राधान्य देणाऱ्या या कारवाईमुळे सामाजिक बांधिलकी व कार्य तत्परतेबाबत कौतुक केले जात आहे
