दौंड (प्रतिनिधी संघराज गायकवाड):
लोकराजा छत्रपती शिवाजी महाराज आणि धर्मवीर छत्रपती संभाजी महाराज यांच्या जयंतीनिमित्त दौंड शहरातील प्रभाग क्रमांक ६ येथील नगरसेविका स्वाती निलेश सावंत यांच्या वतीने लहान मुलांना क्रिकेट व फुटबॉलसह विविध क्रीडा साहित्याचे वाटप करण्यात आले. या उपक्रमातून मुलांमध्ये क्रीडेची आवड निर्माण व्हावी, तसेच मोबाईलच्या आहारी न जाता मैदानाशी त्यांची नाळ जोडली जावी, हा प्रमुख उद्देश होता.
आजच्या डिजिटल युगात लहान मुलांचा वाढता वेळ मोबाईल आणि आभासी जगात जात असल्याने मैदानी खेळांपासून त्यांचे अंतर वाढत आहे. ही बाब लक्षात घेऊन मुलांनी नियमितपणे क्रिकेट, फुटबॉल यांसारखे खेळ खेळावेत, त्यांचा शारीरिक व मानसिक विकास व्हावा आणि निरोगी जीवनशैली अंगीकारावी, या हेतूने हा उपक्रम राबविण्यात आला.
यावेळी नगरसेविका स्वाती सावंत यांनी मुलांशी संवाद साधत खेळाचे महत्त्व विशद केले. संघभावना, शिस्त, परिश्रम, जिद्द आणि नेतृत्वगुण यांचा विकास खेळातूनच होतो, असे सांगून त्यांनी मुलांना नियमित मैदानावर खेळण्याचे आवाहन केले.
क्रीडा साहित्य मिळाल्याने मुलांमध्ये उत्साहाचे वातावरण निर्माण झाले. क्रिकेट व फुटबॉलसारख्या सांघिक खेळांमुळे टीम स्पिरिट, परस्पर सहकार्य आणि आत्मविश्वास वाढण्यास मदत होते. साहित्य वाटपावेळी मुलांच्या चेहऱ्यावरील आनंद पाहून उपस्थित पालक व नागरिकांनी या उपक्रमाचे कौतुक केले.
या उपक्रमामुळे परिसरातील मुलांमध्ये खेळाची गोडी निर्माण होऊन भविष्यात अधिकाधिक खेळाडू घडतील, असा विश्वास नागरिकांनी व्यक्त केला.
