शालार्थ घोटाळा प्रकरणात मोठी कारवाई; जळगावचे माजी शिक्षणाधिकारी शशिकांत हिंगोणेकर अटकेत, शिक्षण विभागात खळबळ

जळगाव(प्रतिनिधी विनोद पवार)दि. २५ जुलै :-राज्यातील गाजत असलेल्या शालार्थ प्रणालीतील कथित आर्थिक गैरव्यवहार प्रकरणात आर्थिक गुन्हे शाखेने मोठी कारवाई करत जळगावचे माजी माध्यमिक शिक्षणाधिकारी शशिकांत हिंगोणेकर यांना धुळे येथून अटक केली आहे. या कारवाईमुळे शिक्षण विभागात पुन्हा एकदा खळबळ उडाली असून, या प्रकरणातील तपासाला वेग आला आहे.
तपास यंत्रणेकडून मिळालेल्या प्राथमिक माहितीनुसार, शालार्थ प्रणालीमध्ये बोगस शिक्षक व शिक्षकेतर कर्मचाऱ्यांच्या नोंदींना मंजुरी देऊन शासनाची आर्थिक फसवणूक झाल्याचा संशय व्यक्त करण्यात आला आहे. याप्रकरणी यापूर्वी दाखल झालेल्या गुन्ह्याच्या तपासादरम्यान अनेक महत्त्वाचे धागेदोरे समोर आल्यानंतर ही कारवाई करण्यात आली.
तपासात समोर आलेल्या माहितीनुसार, शशिकांत हिंगोणेकर जळगाव येथे कार्यरत असताना काही शाळांमधील शिक्षक व शिक्षकेतर कर्मचाऱ्यांच्या नोंदींना नियमानुसार पडताळणी न करता मंजुरी देण्यात आल्याचा संशय आहे. यामुळे शासनाच्या निधीचा गैरवापर झाल्याची शक्यता तपासली जात असून, आर्थिक गुन्हे शाखेचे पथक विविध कागदपत्रांची छाननी आणि संबंधितांची चौकशी करत आहे.
पोलीस सूत्रांच्या माहितीनुसार, या प्रकरणातील आर्थिक व्यवहार, प्रशासकीय मंजुरी तसेच संबंधित कागदपत्रांची सखोल तपासणी सुरू आहे. तपास पूर्ण झाल्यानंतर या कथित घोटाळ्याचे नेमके स्वरूप आणि जबाबदार व्यक्तींबाबत अधिक माहिती समोर येण्याची शक्यता आहे. तपासाच्या आधारे आणखी काही अधिकारी किंवा संबंधित व्यक्तींवरही कारवाई होण्याची शक्यता नाकारता येत नसल्याचे सूत्रांनी सांगितले.
या कारवाईनंतर शिक्षण विभागातील शालार्थ प्रणालीतील मंजुरी प्रक्रिया, आर्थिक व्यवहार आणि प्रशासकीय कार्यपद्धतीवर पुन्हा प्रश्नचिन्ह निर्माण झाले असून, संपूर्ण राज्याचे लक्ष या प्रकरणाकडे लागले आहे. तपास यंत्रणा या प्रकरणाचा सर्वंकष तपास करत असून, दोषी आढळणाऱ्यांवर कायद्यानुसार कठोर कारवाई केली जाईल, असे अधिकृत सूत्रांनी स्पष्ट केले आहे.