श्रीरामपूर:बेकायदेशीररित्या विक्रीसाठी आणलेला सुमारे १३ लाख ५२ हजार रुपयांचा गुटखा आणि सुमारे पाच लाख रुपयांचा आयशर टेम्पो असा एकूण १८ लाख ५२ हजार रुपयांचा मुद्देमाल बेलापुरात पोलिसांच्या संयुक्त पथकाने जप्त केला. ही कारवाई मंगळवारी (ता. १०) सायंकाळी करण्यात आली.
जिल्ह्याचे नव्याने पदभार स्वीकारलेले पोलिस अधीक्षक सोमनाथ घार्गे यांनी गुटखाविरोधातील मोहिमेला श्रीरामपूरपासून सुरुवात करत मोठी कारवाई केली. त्यांच्या गोपनीय सूचनेनुसार शहर व तालुका पोलिसांच्या संयुक्त पथकाने बेलापुरात साई पेट्रोलपंपाजवळील सलमान तांबोळी यांच्या घरासमोर उभ्या असलेल्या टेम्पोची तपासणी केली असता त्यामध्ये गोवा कंपनीचा प्रतिबंधित गुटखा आढळून आला.
ही कारवाई उपनिरीक्षक संदीप मुरकुटे यांच्या नेतृत्वाखाली, पोलिस निरीक्षक नितीन देशमुख यांच्या मार्गदर्शनात पार पडली. यावेळी गुटखा आणि टेम्पो ताब्यात घेण्यात आले असून, घटनास्थळी उपस्थित असलेल्या दोन कामगारांनाही पोलिसांनी अटक केली आहे. ट्रकचा मालक व गुटख्याच्या मालकाबाबत अधिक तपास सुरु आहे.
घटनेची माहिती अन्न व औषध प्रशासनाला देण्यात आली असून त्यांच्या उपस्थितीत पुढील कारवाई केली जात आहे. गुन्हा दाखल करण्याची प्रक्रिया रात्री उशिरापर्यंत सुरू होती.
Advertisement by Unique Computers
👇👇Click the Image below👇👇
Advertisement by Unique Computers
👆👆Click the Image below👆👆
श्रीरामपूर – गुटख्याचा मुख्य पुरवठा केंद्र?
या घटनेनंतर पुन्हा एकदा श्रीरामपूर हे गुटखा साठवणूक व वितरणाचे केंद्रबिंदू असल्याचे स्पष्ट झाले आहे. याआधीही अन्न व औषध प्रशासनाने श्रीरामपूर व बेलापुरात मोठ्या प्रमाणावर गुटखा जप्त केला होता. मात्र, काही वेळा कारवाई करणाऱ्या अधिकाऱ्यांवर ‘तोडपाणी’ केल्याचे आरोपही झाले होते.
कठोर पावले उचलणारे पोलिस अधीक्षक
सोमनाथ घार्गे हे यापूर्वीही श्रीरामपूर उपविभागात उपअधीक्षकपदी कार्यरत होते. त्यावेळी त्यांच्या कार्यशैलीची प्रशंसा झाली होती. आता जिल्ह्याचे पोलिस अधीक्षक म्हणून पदभार घेताच त्यांनी पुन्हा एकदा आपली कार्यक्षमता सिद्ध केली आहे.
गुटखाविरोधातील मोहिमेला वेग
ही कारवाई म्हणजे गुटखा विक्रीवर रोख लावण्यासाठी सुरु झालेल्या मोहिमेचा एक भाग आहे. पोलिस आणि अन्न व औषध प्रशासन यांच्यातील समन्वयामुळे अशा कारवाया आणखी वेग घेतील, अशी अपेक्षा व्यक्त केली जात आहे.
