ब्रह्मपुरी प्रतिनिधी (रुपेश देशमुख) : ब्रम्हपुरी तालुक्यातील खेडमक्ता येथून चोरीला गेलेली ट्रॅक्टर ट्रॉली शोधण्यात ब्रम्हपुरी पोलिसांच्या गुन्हे शोध पथकाला अवघ्या काही दिवसांत यश आले आहे. याप्रकरणी खरबी येथील एका २४ वर्षीय तरुणाला अटक करण्यात आली असून, त्याच्याकडून चोरीचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, खेडमक्ता येथील रहिवासी प्रज्वल महादेव सहारे (वय १७) यांची ट्रॅक्टर ट्रॉली २५ एप्रिल रोजी अज्ञात चोराने पळवून नेली होती. याप्रकरणी सहारे यांच्या तक्रारीवरून ब्रम्हपुरी पोलीस ठाण्यात भारतीय न्याय संहितेच्या (BNS) कलम ३०३ (२) अन्वये गुन्हा दाखल करण्यात आला होता. पोलीस निरीक्षक प्रमोद बानबले यांच्या मार्गदर्शनाखाली पोलीस हवालदार मुकेश गजबे या गुन्ह्याचा तपास करत होते.
तपासादरम्यान, गुन्हे शोध पथकाला गुप्त बातमीदाराकडून मिळालेल्या माहितीच्या आधारे पोलिसांनी संशयित आरोपी गितेश संतोष निशाने (वय २४, रा. खरबी) याला ताब्यात घेतले. त्याची कसून चौकशी केली असता, त्याने ट्रॅक्टर ट्रॉली चोरल्याची कबुली दिली. पोलिसांनी त्याच्याकडून चोरीचा मुद्देमाल जप्त केला आहे.
ही यशस्वी कारवाई जिल्हा पोलीस अधीक्षक आयुष नोपानी, अप्पर पोलीस अधीक्षक ईश्वर कातकडे, उपविभागीय पोलीस अधिकारी दिनकर ठोसरे, पो.नि. प्रमोद बानबले यांच्या मार्गदर्शनात स.पो.नि. मनोज खडसे, पो.ह. मुकेश गजबे, पोलीस अंमलदार प्रविण भिवगडे, निलेश तुमसरे, इर्शाद खान, स्वप्नील पळसपगार व वशिष्ट रंगारी यांनी केली. पोलिसांच्या या धडक कारवाईमुळे परिसरातील शेतकऱ्यांनी समाधान व्यक्त केले आहे.
