शिरपूर (प्रतिनिधी तुषार शेटे) : शिरपूर (धुळे) तालुक्यातील वासर्डी गावात अल्पवयीन मुलीने बाळाला जन्म दिल्यानंतर बालविवाहाचा गंभीर आणि धक्कादायक प्रकार उघडकीस आला आहे. या घटनेमुळे परिसरात मोठी खळबळ उडाली असून संबंधितांवर कठोर कारवाईची मागणी होत आहे.
या प्रकरणी पीडित मुलीचे लग्न लावून देणाऱ्या आई-वडिलांसह पती व सासू-सासऱ्यांविरोधात पोलिसांनी गुन्हा दाखल केला आहे. शहर पोलीस ठाण्यात कार्यरत पोलीस कॉन्स्टेबल शीतल बापू खैरनार यांनी सरकार पक्षातर्फे फिर्याद दिली आहे.
मिळालेल्या माहितीनुसार, १४ मार्च रोजी दुपारच्या सुमारास वासर्डी गावात अल्पवयीन मुलीने बाळाला जन्म दिल्याची माहिती पोलिसांना मिळाली. या घटनेचा अधिक तपास केला असता बालविवाहाचा प्रकार समोर आला. कन्हेरीपाडा येथील दाम्पत्याने ८ मार्च २०२५ रोजी त्यांच्या अल्पवयीन मुलीचे लग्न वासर्डी येथील एका तरुणासोबत लावून दिल्याचे निष्पन्न झाले.
मुलगी अल्पवयीन असल्याची पूर्ण माहिती असूनही तिच्या पतीने तिच्याशी जबरदस्तीने शारीरिक संबंध ठेवले, ज्यामुळे ती गर्भवती झाली. त्यानंतर १४ मार्च रोजी तिने बाळाला जन्म दिला आणि हा संपूर्ण प्रकार उघड झाला.
या प्रकरणी विनोद दशरथ भिल, रत्नाबाई विनोद भिल (रा. कन्हेरीपाडा) तसेच भुरीबाई सुरेश भिल, सुरेश गुलाब भिल आणि राधेशाम सुरेश भिल (रा. वासर्डी) यांच्या विरोधात पोक्सो कायद्यान्वये गुन्हा दाखल करण्यात आला आहे.
पोलिसांनी पुढील तपास सुरू केला असून या घटनेमुळे बालविवाहाच्या प्रश्नावर पुन्हा एकदा चिंता व्यक्त केली जात आहे.
