Times of Maharashtra Desk, Pune : दिल्लीतील लाल किल्ल्याजवळ सोमवारी सायंकाळी ६:५२ वाजता झालेल्या कार बॉम्बस्फोटाने संपूर्ण देशाला हादरवून सोडले होते. या भीषण घटनेत एका ३५ वर्षीय व्यक्तीसह मृतांचा आकडा वाढून आता तेरा झाला असून, अनेक जण जखमी झाले आहेत. या घटनेच्या दोन दिवसांनंतर काल केंद्र सरकारने मंत्रिमंडळाच्या बैठकीत या घटनेचा तीव्र निषेध करत हा स्फोट राष्ट्रविरोधी शक्तींनी घडवलेला घृणास्पद दहशतवादी हल्ला असल्याचे अधिकृतपणे जाहीर केले आहे. या भ्याड हल्ल्यात बळी पडलेल्या निष्पाप नागरिकांच्या सन्मानार्थ दोन मिनिटे शांतता पाळण्यात आली आणि हल्लेखोर व त्यांचे साथीदार यांना लवकरात लवकर पकडून मृतांना न्याय मिळवून देण्याचे निर्देश देण्यात आले. अमेरिकेच्या परराष्ट्र सचिवांनीही या हल्ल्याला दहशतवादी हल्ला ठरवून मृतांना श्रद्धांजली वाहिली आहे.
दहशतवादविरोधी यंत्रणांच्या तपासामध्ये या हल्ल्यामागील भयानक कट उघडकीस आला आहे. स्फोट झालेल्या Hyundai i20 कारमधील व्यक्तीची ओळख डॉ. उमर नबी म्हणून पटली आहे. तो हरियाणातील फरिदाबाद येथील अल-फलह युनिव्हर्सिटीमध्ये सहायक प्राध्यापक होता. उमर नबी हा जम्मू-काश्मीरच्या पुलवामा येथील रहिवासी आहे. प्राथमिक तपासानुसार, हा हल्ला पाकिस्तान मधील जैश-ए-मोहम्मद या दहशतवादी गटाच्या व्हाईट-कॉलर दहशतवादी मॉड्यूलने केला होता. सूत्रांनी दिलेल्या माहितीनुसार, ६ डिसेंबर रोजी बाबरी मशीद पाडण्याचा बदला घेण्यासाठी दिल्लीतील ६ ठिकाणी समन्वित पद्धतीने स्फोट घडवण्याचा आणि त्यात एकूण ३२ कार वापरण्याचा हा कट होता. मात्र, स्फोट घडवण्यापूर्वीच त्याचे काही साथीदार पकडले गेल्यामुळे डॉ. उमर नबीने घाबरून लाल किल्ल्याच्या पार्किंगमध्ये बॉम्ब न फोडता गर्दीच्या ठिकाणी अकाली स्फोट घडवला असे मानले जात आहे.
राष्ट्रीय तपास यंत्रणा या प्रकरणाचा कसून तपास करत आहे. स्फोटाच्या ठिकाणापासून सुमारे ३०० मीटर अंतरावर नवी लाजपत राय मार्केटमधील एका दुकानाच्या छतावर पोलिसांना तुटलेला मानवी हात सापडला आहे. जो फॉरेन्सिक तपासणीसाठी पाठवण्यात आला आहे. तसेच तपासादरम्यान हल्ल्यात वापरल्या गेलेल्या आणखी तीन गाड्यांचा शोध लागला आहे. ज्यात फरीदाबादमधून जप्त केलेली Ford EcoSport आणि Maruti Brezza यांचा समावेश आहे. या गाड्या स्पोटक सामग्री वाहतुकीसाठी वापरण्यात आल्या होत्या. स्फोटासाठी अमोनियम नायट्रेटसह उच्च दर्जाच्या स्फोटकांचा वापर करण्यात आला होता. या पार्श्वभूमीवर, दिल्लीत सुरक्षा वाढवण्यात आली असून, लाल किल्ला मेट्रो स्टेशन पुढील सूचना मिळेपर्यंत बंद ठेवण्यात आले आहे. जम्मू-काश्मीर पोलीस आणि काउंटर इंटेलिजन्स विंगनेही या दहशतवादी मॉड्यूलशी संबंधित असल्याच्या संशयावरून काश्मीर खोऱ्यात अनेक ठिकाणी छापे टाकले आहेत.
