देऊळगाव (प्रतिनिधी बबनराव नागरे) : पुण्यश्लोक अहिल्यादेवी होळकर यांच्या जयंतीनिमित्त सेवानिवृत्त कर्मचारी संघटनेच्या वतीने विरंगुळा भवन, देऊळगाव राजा येथे रविवार, दि. ३१ मे २०२६ रोजी भव्य कार्यक्रमाचे आयोजन करण्यात आले. हा कार्यक्रम सौ. आशाताई शेळके यांच्या अध्यक्षतेखाली तर प्रमुख पाहुण्या म्हणून सौ. पुष्पाताई बोरकर यांच्या उपस्थितीत उत्साहात पार पडला.
कार्यक्रमाच्या प्रारंभी अध्यक्ष आणि प्रमुख पाहुण्यांच्या हस्ते पुण्यश्लोक अहिल्यादेवी होळकर यांच्या प्रतिमेला पुष्पहार अर्पण करून अभिवादन करण्यात आले. यानंतर उपस्थित मान्यवरांनी अहिल्यादेवी होळकर यांच्या जीवनकार्यावर प्रकाश टाकत त्यांच्या लोककल्याणकारी कार्याची माहिती दिली.
यावेळी श्री. निरफळे साहेब, प्रा. रायमल सर, बबनराव नागरे सर, रमेश नरोडे सर तसेच कार्यक्रमाच्या अध्यक्षा सौ. आशाताई शेळके यांनी अहिल्यादेवींच्या प्रशासन कौशल्य, न्यायप्रियता, धर्मकार्य, समाजसेवा आणि महिलांच्या सक्षमीकरणासाठी केलेल्या योगदानाविषयी सविस्तर मार्गदर्शन केले. त्यांच्या विचारांचा आदर्श समाजाने घ्यावा, असे आवाहनही यावेळी करण्यात आले.
कार्यक्रमाला जनसेवा अध्यक्ष तथा सेवानिवृत्त कर्मचारी संघटनेचे अध्यक्ष मा. मापारी मामा, भालेराव सर, बाबुलाल शिवरकर, घनश्यामजी भंडारे, कैलास गाडगे यांच्यासह अनेक सदस्य उपस्थित होते. कार्यक्रमाचे सूत्रसंचालन मा. अहिरे यांनी केले तर आभार प्रदर्शन श्री. बोरकर साहेब यांनी मानले. राष्ट्रगीताने कार्यक्रमाची सांगता करण्यात आली.
