पुणे (औंध) – औंध येथील मेडी पॉइंट हॉस्पिटलजवळ दररोज होणाऱ्या वाहतूक कोंडीमुळे नागरिकांना मोठ्या अडचणींना सामोरे जावे लागत आहे. नागरस रस्ता, डीपी रस्ता आणि औंध-बाणेर लिंक रस्ता हे तीन महत्त्वाचे रस्ते एकाच ठिकाणी एकत्र येत असल्यामुळे येथे दररोज सकाळी व संध्याकाळी मोठ्या प्रमाणात वाहतूक कोंडी होते.
या भागात वाहनचालकांचे बेशिस्त वर्तन, नियमांचे उल्लंघन आणि वाहतूक नियोजनाचा अभाव यामुळे परिस्थिती अधिक गंभीर झाली आहे. चतुःशृंगी वाहतूक विभागाने काही वेळा उपाययोजना केल्या असल्या तरी त्या सातत्याने न राबवल्यामुळे कोंडीचा प्रश्न कायम आहे.
मेडी पॉइंट चौक ते कै. यशवंतराव भाले चौक आणि डॉ. बाबासाहेब आंबेडकर चौक या मार्गावर दररोज वाहनांच्या लांबच लांब रांगा लागतात. याचा परिणाम नोकरदार वर्ग, विद्यार्थी, स्थानिक रहिवासी आणि व्यावसायिकांना सहन करावा लागत आहे. औंध-बाणेर लिंक रोड आणि डीपी रोड यांवरही याचा थेट परिणाम दिसून येतो.
Advertisement by Unique Computers
👇👇Click the Image below👇👇
Advertisement by Unique Computers
👆👆Click the Image below👆👆
स्थानिक व्यावसायिकांनी सांगितले की, या वाहतूक कोंडीमुळे दुकानात येणाऱ्या ग्राहकांची संख्या घटली असून आर्थिक नुकसान होत आहे. पादचाऱ्यांनाही रस्त्यावरून सुरक्षितपणे चालणे अवघड झाले आहे.
समस्या सोडवण्यासाठी काही उपाय सुचवण्यात आले आहेत. उदाहरणार्थ, कुमार प्रेरणा सोसायटीसमोरील पदपथ कमी करून बाणेरकडून येणारी वाहतूक विनाअडथळा पुढे जाऊ देणे, तसेच वाहतूक नियंत्रणासाठी बॅरिकेटिंगचा वापर करणे. यासाठी महापालिकेच्या पथ विभागाकडे पाठपुरावा सुरू आहे.
स्थानिक रहिवासी आणि व्यावसायिकांनी महापालिका व वाहतूक विभागाकडे तत्काळ आणि ठोस उपाययोजना राबवण्याची मागणी केली आहे, जेणेकरून हा रोजचा त्रास संपेल आणि जनजीवन सुरळीत होईल.
