दौंड (प्रतिनिधी तुषार शेटे):संयुक्त राष्ट्रसंघाने घोषित केलेला २३ जून हा आंतरराष्ट्रीय विधवा दिन संपूर्ण महाराष्ट्रात “एकल महिला दिवस” म्हणून साजरा करण्यात यावा असे निर्देश आज बैठकीच्या माध्यमातून संबंधित अधिकाऱ्यांना दिले आहेत. तसेच हा दिवस साजरा करत असताना महाराष्ट्राच्या धोरणाप्रमाणे विधवा या शब्दाऐवजी ‘एकल महिला’ ही सन्मानजनक संज्ञा वापरावी अशाही सूचना दिल्या आहेत.
राज्य शासनामार्फत एकल महिला धोरण तयार करण्याची प्रक्रिया युद्धपातळीवर सुरू आहे, या पार्श्वभूमीवर आज आयोजित करण्यात आलेल्या बैठकीच्या माध्यमातून या सूचना दिल्या आहेत. राज्यातील सर्व महानगरपालिका, नगरपालिका, नगरपंचायत व ग्रामपंचायतींमध्ये एकल महिला दिन साजरा करावा. या कार्यक्रमासाठी गावातील किंवा शहरातील सर्व एकल महिलांना सन्मानाने निमंत्रित करावे. या कार्यक्रमाच्या माध्यमातून महात्मा ज्योतिराव फुले यांच्या प्रतिमेचे पूजन करून त्यांचे २०० वे जयंती वर्ष साजरे करावे. महिला सक्षमीकरणासाठी त्यांनी दिलेल्या योगदानाची उपस्थित महिलांना माहिती द्यावी, रोजगार, स्वयंरोजगार आणि उपजीविकेच्या संधींबाबत चर्चा करून बचतगटात नसलेल्या महिलांना बचतगट चळवळीमध्ये समाविष्ट करून घेण्यासाठी विशेष प्रयत्न करावेत.
आपल्या गावात / शहरात एकल महिलांना रूढी परंपरांच्या आधारावर अपमानास्पद वागणूक दिली जाणार नाही याबाबत ठराव मंजूर करण्यात यावा, राज्य शासनाच्या प्रस्तावित एकल महिला धोरणामध्ये कोणत्या बाबींचा समावेश असावा याविषयी महिलांची मते, सूचना व आक्षेप जाणून घ्यावेत, याबाबत शासनाकडे अहवाल पाठवावा अशा सूचना संबंधित अधिकाऱ्यांना दिल्या आहेत.
या बैठकीस महिला व बालविकास विभागाचे सचिव डॉ. अनुप कुमार यादव, एकात्मिक बाल विकास सेवा योजना आयुक्त डॉ. माधवी सरदेशमुख, पुणे आयुक्त डॉ. जगदीश मणियार, सहसचिव श्री. वी. रा. ठाकूर यांच्यासह इतर अधिकारी उपस्थित होते.
