सिन्नर (प्रतिनिधी नवनाथ आव्हाड): भारतीय जनता पक्षातर्फे सिन्नर येथे आंतरराष्ट्रीय योग दिन उत्साहपूर्ण वातावरणात साजरा करण्यात आला. शेठ बी. एन. सारडा विद्यालयाच्या परिसरात आयोजित करण्यात आलेल्या या कार्यक्रमात भाजप पदाधिकारी, शिक्षक, विद्यार्थी, पालक आणि नागरिकांनी मोठ्या संख्येने सहभाग घेत योगासने व प्राणायामाचा सराव केला.
यावेळी विद्यालय समितीचे अध्यक्ष बापूसाहेब पंडित, भाजप नेते उदय सांगळे, शहराध्यक्ष सजन सांगळे, विस्तार अधिकारी कैलास सांगळे, योग प्रशिक्षक केशव तुंगार, शेठ बी. एन. सारडा विद्यालयाचे मुख्याध्यापक गोरक्षनाथ बागुल, चांडक कन्या विद्यालयाच्या मुख्याध्यापिका सुनीता कर्डिले, सविता कोठुरकर, नगरसेवक अनिल सरवार, आशा कर्पे, देवयानी वाघ, आनंद सानप, बाळासाहेब कराड, निलेश लोणारे, कन्हैया वरंदळ, मुकुंद खर्जे, योगेश सानप तसेच नाशिक येथील भारतीय पतंजली योग संस्थेचे पदाधिकारी उपस्थित होते.
कार्यक्रमात योगासने आणि प्राणायामाचे महत्त्व अधोरेखित करण्यात आले. वक्त्यांनी सांगितले की, नियमित योगाभ्यासामुळे शारीरिक आणि मानसिक आरोग्य सुधारते, तणाव कमी होतो तसेच जीवनशैली अधिक निरोगी बनते.
वक्त्यांनी सांगितले की, योग ही भारताने जगाला दिलेली अमूल्य देणगी आहे आणि आज जगातील 170 हून अधिक देशांनी योगाचे महत्त्व मान्य केले आहे. योग हा शरीर, मन आणि आत्म्याचा समतोल साधण्याचा प्रभावी मार्ग आहे. निरोगी भारताच्या निर्मितीसाठी प्रत्येकाने आपल्या दैनंदिन जीवनात योगाचा समावेश करावा, असे आवाहनही यावेळी करण्यात आले. कार्यक्रमाच्या शेवटी उपस्थितांनी नियमित योगाभ्यास करून निरोगी व सशक्त समाजाच्या निर्मितीसाठी योगदान देण्याचा संकल्प केला.
