आंतरराष्ट्रीय योग दिन उत्साहात साजरा

सिन्नर (प्रतिनिधी नवनाथ आव्हाड): सिन्नर येथील गुरुवर्य मामासाहेब दांडेकर कला, भगवंतराव वाजे वाणिज्य व विज्ञान महाविद्यालयात आंतरराष्ट्रीय योग दिन उत्साहात साजरा करण्यात आला. महाविद्यालयाच्या मैदानावर आयोजित कार्यक्रमाचे उद्घाटन प्राचार्य डॉ. आर. एन. भवरे यांच्या हस्ते करण्यात आले.
या प्रसंगी सातपूर येथील योगाचार्य प्रा. रामेश्वर उगले यांनी महाविद्यालयातील प्राध्यापक, शिक्षक, शिक्षकेतर कर्मचारी व सेवकांना विविध योगासने आणि प्राणायामाचे प्रात्यक्षिक करून दाखविले. उपस्थितांनीही उत्स्फूर्त सहभाग घेत योगासने केली. सुमारे एक तास चाललेल्या या कार्यक्रमात विविध योगासनांचे महत्त्व, त्यांचे आरोग्यदायी फायदे तसेच दैनंदिन जीवनातील योगाचे अनन्यसाधारण महत्त्व याविषयी मार्गदर्शन करण्यात आले.
कार्यक्रमाला एनसीसी विभाग प्रमुख प्रा. डॉ. एस. बी. भिसे, विविध विभागांचे विभागप्रमुख, राष्ट्रीय सेवा योजना (NSS), रोव्हर-रेंजर शाखेचे विद्यार्थी तसेच महाविद्यालयातील कर्मचारी मोठ्या संख्येने उपस्थित होते.
कार्यक्रमाच्या यशस्वी आयोजनासाठी सर्व विभागांनी सहकार्य केले. कार्यक्रमाचे आभार प्रदर्शन क्रीडा शिक्षक प्रा. पी. एम. खैरनार यांनी केले.