तालुका (प्रतिनिधी जाबिर खान): अहेरी तालुक्यातील जिमलगट्टा येथील शेतकरी कुटुंबातील समय्या मलय्या मोगलीवार यांनी आपल्या जिद्द, मेहनत आणि चिकाटीच्या जोरावर पोलीस उपनिरीक्षक (PSI) पद मिळवत प्रेरणादायी यश संपादन केले आहे.
अत्यंत गरीब परिस्थितीत वाढलेल्या समय्या यांनी शिक्षण घेत असताना अनेक कठीण प्रसंगांचा सामना केला. घरची आर्थिक परिस्थिती हलाखीची असल्याने त्यांनी लहानपणापासूनच काम करून शिक्षण पूर्ण केले. पेपर विक्री, हॉटेलमध्ये वेटर म्हणून काम तसेच पानटपरी चालवत त्यांनी शिक्षणाची वाटचाल सुरू ठेवली.
२०१२ मध्ये त्यांची गडचिरोली पोलीस दलात शिपाई म्हणून निवड झाली. नक्षलग्रस्त भागात सेवा बजावत असतानाही त्यांनी मोठे अधिकारी होण्याचे स्वप्न कायम जिवंत ठेवले. ड्युटी सांभाळत त्यांनी MPSC परीक्षेची तयारी सुरू ठेवली. २०१७ आणि २०२२ मध्ये त्यांना अपयशाचा सामना करावा लागला. मात्र अपयशाने खचून न जाता त्यांनी अधिक मेहनत घेतली आणि अखेर २०२३ च्या MPSC परीक्षेत यश मिळवले.
लेखी परीक्षा आणि शारीरिक चाचणीत उत्कृष्ट गुण मिळवत त्यांनी राज्यात ४३५ वी रँक प्राप्त केली. त्यांच्या या यशामुळे जिमलगट्टा परिसरासह संपूर्ण गडचिरोली जिल्ह्यात आनंदाचे वातावरण आहे. संघर्ष, मेहनत आणि आत्मविश्वासाच्या जोरावर कोणतेही स्वप्न पूर्ण करता येते, हे समय्या मोगलीवार यांनी आपल्या कर्तृत्वातून सिद्ध करून दाखवले आहे.
