विष्णू गायकवाड ( गेवराई प्रतिनिधी ) : महाराष्ट्र परिट (धोबी) सेवा मंडळाच्या प्रमुख पदाधिकाऱ्यांच्या उपस्थितीत गेवराई तालुका कार्यकारिणीची घोषणा करण्यात आली असून, गेवराई येथील समाजाचे सक्रिय व धडाडीचे कार्यकर्ते अशोक बाबुराव मोताळे यांची तालुकाध्यक्षपदी बिनविरोध निवड करण्यात आली आहे. त्यांच्या निवडीमुळे परिट (धोबी) समाजात आनंदाचे वातावरण निर्माण झाले असून विविध स्तरांतून त्यांचे अभिनंदन केले जात आहे.
बीड येथे नुकतीच महाराष्ट्र परिट (धोबी) सेवा मंडळाच्या प्रमुख पदाधिकाऱ्यांची महत्त्वपूर्ण बैठक पार पडली. या बैठकीत संघटनेची ताकद वाढविणे, समाजाच्या विविध प्रश्नांवर चर्चा करणे तसेच तालुका स्तरावर संघटन बळकट करण्याबाबत सविस्तर चर्चा करण्यात आली. त्यानंतर गेवराई तालुका कार्यकारिणीची घोषणा करण्यात आली. यावेळी पदाधिकाऱ्यांच्या हस्ते अशोक मोताळे यांना निवडीचे पत्र देऊन त्यांची अधिकृतपणे तालुकाध्यक्षपदी निवड जाहीर करण्यात आली.
या प्रसंगी जिल्हाध्यक्ष प्रधान पवार, माजी जिल्हाध्यक्ष मोहन राऊत, बीड तालुकाध्यक्ष बाबुराव भालेकर, सचिव विक्रम वाघमारे, ज्येष्ठ नेते आसाराम राऊत, सतीश मुळे, प्रदीप वाघमारे, विकास व्यवहारे, अहीलेश वाघमारे, सोपान राऊत, राहुल राऊत, तुषार कासार, लहुराव माकुडे यांच्यासह अनेक पदाधिकारी व समाजबांधव मोठ्या संख्येने उपस्थित होते.
निवडीनंतर बोलताना अशोक मोताळे म्हणाले की, परिट (धोबी) सेवा मंडळाच्या पदाधिकाऱ्यांनी माझ्यावर दाखवलेल्या विश्वासाबद्दल मी सर्वांचा मनापासून आभारी आहे. आगामी काळात समाजाच्या सर्वांगीण विकासासाठी कटिबद्ध राहून युवकांना मार्गदर्शन, शैक्षणिक मदत, शासकीय योजनांचा लाभ मिळवून देणे तसेच रोजगाराच्या संधी उपलब्ध करून देण्यासाठी विविध उपक्रम राबवले जातील. समाजातील सर्वसामान्यांच्या सुख-दुःखात संघटना नेहमीच सोबत राहील.
दरम्यान, अशोक मोताळे यांच्या निवडीबद्दल समाजातील विविध मान्यवरांनी त्यांचे अभिनंदन करून पुढील वाटचालीस शुभेच्छा दिल्या.
