शेवगाव (प्रतिनिधी जयप्रकाश बागडे) : तालुक्यातील चापडगाव येथे वीज मंडळाच्या सबस्टेशनमध्ये झालेल्या धाडसी चोरीप्रकरणी पोलिसांनी मोठी कारवाई करत तीन आरोपींना अटक केली आहे. या कारवाईत पोलिसांनी तब्बल ५ लाख ७२ हजार ७०० रुपयांचा मुद्देमाल जप्त केला असून, या घटनेमुळे परिसरात खळबळ उडाली होती.
२२ एप्रिलच्या मध्यरात्री चार अज्ञात चोरट्यांनी चापडगाव येथील एमएसईबी सबस्टेशनमध्ये प्रवेश केला. यावेळी त्यांनी वॉचमन गोकुळ संपत मडके (रा. गदेवाडी) यांच्यावर लाकडी दांडके व गजाने हल्ला करून गंभीर मारहाण केली. त्यानंतर चोरट्यांनी ट्रान्सफॉर्मरची मोडतोड करत त्यातील सुमारे ९९० लिटर ट्रान्सफॉर्मर ऑईल आणि ५३० किलो कॉपर कॉइल असा मुद्देमाल जबरदस्तीने चोरून नेला. या प्रकरणी गुन्हा दाखल करण्यात आला होता.
घटनेचे गांभीर्य लक्षात घेऊन गुन्हे शाखेचे पोलीस निरीक्षक किरण कुमार कबाडी यांनी तपासाची सूत्रे हाती घेतली. तांत्रिक विश्लेषण, सीसीटीव्ही फुटेज आणि गोपनीय माहितीच्या आधारे पोलिसांनी सापळा रचून आरोपींना अटक केली. अटक करण्यात आलेले आरोपी भीमा लक्ष्मण म्हस्के, अविनाश कल्याण धुरंधरे आणि अमोल गणेश रांजवन (सर्व रा. बीड) हे सराईत गुन्हेगार असल्याचे निष्पन्न झाले आहे.
पोलिसांनी आरोपींकडून चोरीत वापरलेली शिफ्ट कारसह एकूण ५ लाख ७२ हजार ७०० रुपयांचा मुद्देमाल जप्त केला आहे. या कारवाईमुळे अशा प्रकारच्या गुन्ह्यांना आळा बसण्यास मदत होणार असल्याचे सांगितले जात आहे.
या प्रकरणाचा पुढील तपास शेवगाव पोलीस ठाण्याकडून सुरू असून, फरार असलेल्या इतर आरोपींचा शोधही घेतला जात आहे.
