निफाड (प्रतिनिधी – उत्तम जाधव) : निफाड तालुक्यातील सुकेणे गावातील नीलम निकम (जाधव) यांनी प्रतिकूल परिस्थितीवर मात करत प्रथम वर्ग दिवाणी न्यायाधीश पदावर झेप घेत उल्लेखनीय यश संपादन केले आहे. पतीच्या आकस्मिक निधनानंतर खचून न जाता, त्यांच्या अपूर्ण स्वप्नाला स्वतःचे ध्येय मानून त्यांनी संघर्षाच्या जोरावर हे शिखर गाठले.
साध्या कुटुंबात जन्मलेल्या नीलम यांचे बालपण अत्यंत साधेपणात गेले. गावातील शाळेत शिक्षण घेत असताना त्यांनी शांतपणे आपले आयुष्य पुढे नेले. सन २०१२ मध्ये त्यांचा विवाह झाला आणि नव्या आयुष्याची स्वप्ने त्यांनी पाहिली. मात्र, लग्नानंतर अवघ्या एका वर्षातच त्यांच्या पतीचे निधन झाले. या दुःखद घटनेने त्यांचे आयुष्य पूर्णपणे बदलून गेले.
या कठीण प्रसंगी हार न मानता त्यांनी दुःखालाच आपली ताकद बनवली. पतीचे न्यायाधीश होण्याचे अपूर्ण स्वप्न त्यांनी स्वतःचे ध्येय मानले. घरातील जबाबदाऱ्या, समाजाची नजर आणि मनातील वेदना यांचा सामना करत त्यांनी पुन्हा शिक्षणाचा मार्ग स्वीकारला.
त्यांनी बी.ए., बी.एड. आणि एल.एल.बी. या पदव्या प्राप्त केल्या. निफाड न्यायालयात वकिली करताना त्यांनी दिवस-रात्र परिश्रम घेतले. अखेरीस महाराष्ट्र लोकसेवा आयोगाच्या प्रथम वर्ग दिवाणी न्यायाधीश परीक्षेत त्यांनी उल्लेखनीय यश मिळवले. मुंबई उच्च न्यायालयातील मुलाखतीत आत्मविश्वासाने सामोरे जात त्यांनी न्यायाधीश पदाची गवसणी घातली.
त्यांच्या या यशाबद्दल निफाडचे माजी आमदार अनिल पाटील कदम, वकील संघाचे अध्यक्ष अॅड. प्रवीण ठाकरे, उपाध्यक्ष जंगम तसेच निफाड वकील संघाने त्यांचे विशेष अभिनंदन केले आहे.
संघर्षाच्या राखेतून उभी राहिलेली ही यशोगाथा अनेकांना प्रेरणा देणारी असून, नीलम निकम या आगामी काळात समाजासाठी न्यायाची नवी दिशा ठरतील, असा विश्वास व्यक्त केला जात आहे.
