निफाड (प्रतिनिधी उत्तम जाधव) : लासलगाव कृषी उत्पन्न बाजार समितीच्या संचालक मंडळाच्या काल पार पडलेल्या बैठकीत एक महत्त्वपूर्ण आणि ऐतिहासिक निर्णय घेण्यात आला. महाराष्ट्र राज्याचे माजी उपमुख्यमंत्री स्वर्गीय अजित दादा पवार यांच्या स्मृतींना अभिवादन करण्यासाठी निफाड येथील उपबाजार आवार तसेच मुख्य प्रवेशद्वाराला त्यांचे नाव देण्याचा प्रस्ताव बहुमताने मंजूर करण्यात आला.
या बैठकीत उपस्थित सर्व संचालकांनी या प्रस्तावाचे स्वागत करत एकमताने पाठिंबा दर्शविला. परिणामी, लवकरच निफाड येथील उपबाजार आवाराला “लासलगाव कृषी उत्पन्न बाजार समितीचे स्व. अजित दादा पवार उपबाजार, निफाड” असे नामकरण करण्यात येणार आहे. तसेच मुख्य प्रवेशद्वाराला “स्व. अजित दादा पवार प्रवेशद्वार” असे नाव देण्यात येणार आहे.
या निर्णयामुळे परिसरात समाधान व्यक्त होत असून, स्वर्गीय अजित दादा पवार यांच्या कार्याची आठवण कायम राहील, अशी भावना व्यक्त करण्यात येत आहे. कृषी व शेतकरी क्षेत्रातील त्यांच्या योगदानाला उजाळा देण्यासाठी हा निर्णय महत्त्वाचा मानला जात आहे.
लासलगाव बाजार समिती ही देशातील अग्रगण्य कृषी उत्पन्न बाजार समित्यांपैकी एक असून, कांदा बाजारासाठी विशेष ओळखली जाते. त्यामुळे या ठिकाणी घेतलेल्या या निर्णयाला विशेष महत्त्व प्राप्त झाले आहे.
बाजार समितीच्या या निर्णयामुळे निफाड तालुक्यातील शेतकरी आणि व्यापारी वर्गात सकारात्मक वातावरण निर्माण झाले असून, आगामी काळात या नामांतराची अधिकृत अंमलबजावणी करण्यात येणार आहे.
